Зварот да беларускай грамадскасці і прэсы

Ад самага свайго заснавання ў 1947 г. місія была і застаецца не толькі асяродкам рэлігійнага жыцця, але таксама месцам захавання і ўзгадавання духу беларускасці. Яна — дом для нашых нацыянальных і дабрачынных арганізацый (Згуртавання беларусаў Вялікабрытаніі (ЗБВБ), Англа-беларускага таварыства, Камітэта дапамогі ахвярам радыяцыі), беларускай дзіцячай школкі. Місія — месца, куды беларусы на працягу дзесяцігоддзяў збіраюцца ў дні нашых нацыянальных святаў, дзе ладзяцца лекцыі і навуковыя ды літаратурныя канферэнцыі, дзе выдаюцца беларускія кнігі і газеты, робяцца пераклады. У пачатку 1970-х гадоў святары каталіцкае місіі сталі заснавальнікамі і першымі ахвярадаўцамі Бібліятэкі імя Ф. Скарыны — славутай Скарынаўкі, найбуйнейшага па-за межамі Бацькаўшчыны збору беларускай і беларусазнаўчай літаратуры. Багатае і разнастайнае духоўнае і культурнае жыццё беларускае супольнасці ў Брытаніі ды Еўропе немагчыма ўявіць без каталіцкае місіі ды без ахвярнае працы ейнага кіраўніка, а. Аляксандра Надсана. У часы, калі беларускае жыццё на Бацькаўшчыне знаходзіцца пад уціскам, Лонданскі асяродак застаецца адным з апірышчаў нацыянальнага духу.

Сэрцам Беларускае місіі ды рэлігійна-культурнага цэнтра ў Лондане з’яўляецца Марыян Гаўз (Марыйны дом) — дом, што месціць царкву св. св. апосталаў Пятра і Паўла. Тут ужо больш за 50 гадоў творыцца штодзённая малітва за нашую Бацькаўшчыну і народ, тут гучыць Боская Літургія па-беларуску, тут беларусы вянчаюцца, хрысцяць дзяцей, адпяваюць памерлых, сюды прыходзяць памаліцца шматлікія госці з Беларусі і дыяспары. Гэты будынак быў набыты на ахвяраванні беларусаў усяго свету. У цяжкія паваенныя часы, апынуўшыся на чужыне, людзі часта аддавалі апошняе, бо верылі, што гэтым засноўваюць сталы беларускі асяродак. Доўгі час таямніцай для ўсіх нас быў факт, што Марыян Гаўз тады не стаў маёмасцю беларусаў. У выніку маніпуляцый і насуперак волі ахвярадаўцаў ён перайшоў ва ўласнасць структур Каталіцкай царквы ў Ватыкане. Цяпер Кангрэгацыя Усходніх цэркваў, якая заяўляе правы на Марыян Гаўз, патрабуе высялення з яго беларускае місіі і царквы.

Страта Марыян Гаўзу будзе мець трагічныя і незваротныя наступствы. Лонданская місія — сімвал і унікальны прыклад яднання нацыі без штучных канфесійных падзелаў — атрымае ўдар, ад якога ёй будзе надзвычай цяжка падняцца. Наша супольнасць у Брытаніі глыбока абурана рашэннем царкоўных улад, якое сведчыць пра ігнараванне Ватыканам інтарэсаў і духоўных патрэб беларусаў. Мы робім розныя захады, каб змяніць сітуацыю. Нам неабходная, аднак, дапамога нашых суродзічаў у Беларусі ды ў іншых краінах. Мы верым, што салідарныя намаганні многіх беларусаў могуць прынесці станоўчы плён.

Калі вы хочаце дапамагчы ў справе ўратавання Марыян Гаўзу, дасылайце лісты кіраўніку Кангрэгацыі Усходніх цэркваў, кардыналу Ігнацыю Мусу Давуду на адрас:

Sua Eminenza Cardinale Ignace Moussa Daoud, Prefetto della Congregazione per le Chiese Orientali, 00120 Citta del Vaticano, Vatican Сity

27 красавіка 2002 г.

Зварот падпісалі дзеячы беларускіх суполак Вялікабрытаніі і Францыі.