Тэатральныя здольнасці ліцэістаў

Янка ЦЕЛУШЭЦКІ

У катэгорыі сцэнічных пастановак гайнаўскія ліцэісты падрыхтавалі „Пінскую шляхту” В. Дуніна-Марцінкевіча і сцэнку „Чаравічкі-туфелькі”, а бельскія — спектакль паводле паэмы „Курган” Я. Купалы. У іх выканаўцы маглі найлепш праявіць свае тэатральныя здольнасці.

Мерапрыемства ад некалькіх дзесяткаў гадоў арганізуе Галоўнае праўленне Беларускага грамадска-культурнага таварыства. Сёлета ўзнагароды лаўрэатам прыдбала БГКТ і Літаб’яднанне „Белавежа”.

Конкурс ацэньвала камісія ў саставе: Тамара Русачык (старшыня), Альжбета Фіёнік і Яніна Плютовіч. Журы адзначыла, што зацікаўленне творчасцю выдатных беларускіх літаратараў Янкі Купалы і Якуба Коласа было невялікае — іх творы выбрала пяць асоб. А сёлета ж святкуем 120 гадавіну з дня нараджэння класікаў. Моладзь з сярэдніх школ ахвотна дэкламавала творы „белавежцаў”: Міхася Шаховіча (яго гумарэскі выбралі чатыры асобы), Сакрата Яновіча, Надзеі Артымовіч і Міры Лукшы (яны выступілі тройчы) ды Юркі Геніюша.

Гран-пры заваявала Наталля Лемеш з Комплексу школ з дадатковым навучаннем беларускай мовы ў Гайнаўцы. Першынство здабыла Эмілія Шымчук з белліцэя ў Бельску-Падляшскім. Другое раўнапраўнае месца занялі Дарота Нікалаюк з Бельска і Агнешка Пуц з Гайнаўкі, а трэцяе месца падзялілі Анна Маркевіч і Малгажата Карпюк з Гайнаўкі. Камісія прызнала таксама чатыры вылучэнні: Юстыне Койла і Аліцыі Леанюк з Гайнаўкі ды Жанэце Ролі і Юстыне Юрчук з Бельска.

Сярод школьных тэатральных калектываў найлепшы быў калектыў з Бельскага белліцэя (першае месца). Ён выступіў з пастаноўкай паэмы „Курган” Янкі Купалы. Другое і трэцяе месцы занялі калектывы з Гайнаўкі: другое за п’есу „Пінская шляхта” і трэцяе — за сцэнку „Чаравічкі-туфелькі”. Для юных самадзейных акцёраў былі таксама індывідуальныя ўзнагароды. Зноў Наталля Лемеш добра праявіла сябе ў ролі Дзясяцкага („Пінская шляхта”), а Андрэй Сыльвяструк (Дзед Тамаш) і Дарыюш Баена (Гусляр) у пастаноўцы „Курган”.