Немцы і сілезцы таксама апасаюцца перапісу

Нямецкая рабочая супольнасць „Прымірэнне і будучыня” звярнулася да пражываючых у Польшчы немцаў з заклікам заявіць у ходзе перапісу сваю сапраўдную нацыянальнасць. Выказала яна таксама рашучы пратэст супраць прапагандавання сілезскай нацыянальнасці. На думку нямецкіх арганізацый, дзейнасць Руху аўтаноміі Сілезіі вядзе да фальшавання палітычнай рэальнасці і супярэчыць польскім інтарэсам, а прыдуманая дзеячамі РАС нацыянальнасць не павінна быць заношана ў перапісныя анкеты.

Лідэр „Прымірэння і будучыні” Дзітмар Брэмер дзеянні РАС, які намаўляе жыхароў Сілезіі дэклараваць у час перапісу сілезскую нацыянальнасць, лічыць спробай дэзінтэграцыі нямецкай грамадскасці Верхняй Сілезіі, а інфармацыйны шум вакол гэтай справы можа толькі ўзмоцніць боязь перад падаваннем сапраўднай нацыянальнасці, паколькі калісьці прыналежнасць да нямецкай нацыі пагражала непрыемнымі паслядоўнасцямі, напрыклад, вызваленнем з работы.

Прэс-сакратар Руху аўтаноміі Сілезіі Ежы Гажэлік аспрэчыў закіды нямецкіх арганізацый. Мэтай РАС не з’яўляецца схілянне немцаў дэклараваць сілезскую нацыянальнасць, — патлумачыў ён, — а толькі закліканне да гэтага тых асоб, якія лічаць сябе сілезцамі. 13 сакавіка г.г. Рух аўтаноміі Сілезіі выдаў адмысловую заяву, у якой выказаў занепакоенасць магчымасцю маніпуляцыі вынікамі перапісу, паколькі ў інструкцыі Галоўнай статыстычнай установы пералічаны адзінаццаць нацыянальнасцей, у ліку якіх няма сілезскай. Гэта, на думку аўтанамістаў, беспрэцэдэнтная спроба парушэння польскай дзяржавай свабоды сілезцаў на самавызначэнне.

(вл)