Аб 200-годдзі з дня нараджэння Ігнація Дамейкі

Павел ЛАТУШКА

Лёс І. Дамейкі, акрамя Беларусі, цесна звязаны з Польшчай, Літвой, Францыяй і, асабліва, з Чылі. Чылійскі ўрад абвясціў І. Дамейку нацыянальным героем. Яго імем названы горад, пасёлак, універсітэт, нацыянальная бібліятэка ў Чылі, бібліятэка ў Буэнас-Айрасе. Шануюць памяць славутага земляка і ў Беларусі. На яго радзіме ў Карэліцкім раёне створаны музей.

У ходзе візіту ў Чылі ў 1999 годзе дэлегацыя Беларусі на чале з першым намеснікам міністра замежных спраў Сяргеем Мартынавым наведала дом-музей І. Дамейкі ў Сант’яга. Пад час наведвання абодвума бакамі выказвалася зацікаўленасць ва ўсталяванні супрацоўніцтва паміж музейнымі ўстановамі Чылі і Беларусі.

Рэспубліка Беларусь выступіла з ініцыятывай уключэння юбілею І. Дамейкі ў каляндар памятных дат ЮНЕСКА. Дзякуючы намаганням беларускай дыпламатыі на 31-й сесіі Генеральнай канферэнцыі ЮНЕСКА было прынята рашэнне ўключыць юбілей І. Дамейкі ў каляндар памятных дат ЮНЕСКА.

Урадам Беларусі створаны арганізацыйны камітэт па падрыхтоўцы і правядзенні мерапрыемстваў па святкаванні 200-годдзя з дня нараджэння І. Дамейкі. Адным са значных мерапрыемстваў будзе правядзенне восенню 2002 года ў Мінску Міжнароднай навуковай канферэнцыі, прысвечанай І. Дамейку.

У падрыхтоўцы мерапрыемстваў па святкаванні юбілею І. Дамейкі актыўны ўдзел бяруць беларускія дыпламатычныя прадстаўніцтвы за мяжой. У сакавіку г.г. адбыліся сустрэчы прадстаўнікоў Пасольства Беларусі ў Аргенціне з дырэктарам бібліятэкі імя І. Дамейкі ў Буэнас-Айрасе Энрыке Казлоўскім і захавальнікам дома-музея І. Дамейкі ў Сант’яга (Чылі) Пабла Дамейкам. З аргенцінскім і чылійскім бакамі дасягнута дамоўленасць аб абмене матэрыяламі, звязанымі з імем І. Дамейкі, з Нацыянальным навукова-асветным цэнтрам імя Ф. Скарыны і музеем І. Дамейкі ў Карэліцкім раёне і аб супрацоўніцтве на перспектыву.

Пабла Дамейка выказаў зацікаўленасць у наведванні Беларусі і ўдзеле ў Міжнароднай навуковай канферэнцыі, прысвечанай І. Дамейку.