Ніва № 12 (2393), 24 сакавіка 2002 г.

Сустрэча з міністрам

Паўліна ШАФРАН

Міжнародныя кантакты і суседскае супрацоўніцтва былі тэмай спаткання міністра замежных спраў Беларусі Міхаіла Хвастова з прадстаўнікамі самаўрадаў паўднёва-ўсходняй часткі Падляшскага ваяводства, якое адбылося 11 сакавіка г.г. у сядзібе ГП БГКТ. У спатканні ўдзельнічалі пасол Сейма Яўген Чыквін, сенатар Сяргей Плева, Беластоцка-Гданьскі епіскап Іакаў, амбасадар Рэспублікі Беларусь у Польшчы Мікалай Крэчка. Спатканне пачалося з выступлення старшыні ГП БГКТ Яна Сычэўскага, у якім прамоўца моцна акцэнтаваў неабходнасць паправы ўзаемаадносін Польшчы і Беларусі ў галіне не толькі культуры, але і гаспадаркі. Міністр Хвастоў і прадстаўнікі гмінных і павятовых самаўрадаў гаварылі аб гранічным руху, працы мытных служб і неабходнасці ліквідацыі карупцыі на мяжы. Да гэтага можна яшчэ дадаць прапанову ўтварэння большай колькасці міжнародных пераходаў на нашай мяжы, што, на думку міністра замежных спраў Беларусі, карысна паўплывае на гаспадарчы абмен. Гэтую тэму закрануў у сваім выступленні войт Арлянскай гміны Ян Добаш, які стараецца наладзіць такія кантакты з Гродзеншчынай і Брэстчынай. На пытанне, ці такія кантакты будуць магчымымі ў недалёкай будучыні, міністр Хвастоў адказаў, што ў гэтай справе не бачыць ніякіх перашкод, а толькі добрыя перспектывы земляробам па абодвух баках мяжы.

Гайнаўскі стараста Уладзімір Пятрочук закрануў справу ўтварэння Белавежскага еўрарэгіёна і турыстычных пагранпераходаў, якія безумоўна памогуць у развіцці турызму, якім зацікаўлены і беларускія ўлады. Стараста ўспомніў таксама і пра Гайнаўскі музей, які патрабуе экспанатаў, а міністр запэўніў яго ў хуткай дапамозе.

Справу адукацыі закранула дырэктар Бельскага белліцэя Зінаіда Навіцкая. Згадваючы выпускнікоў Бельскага і Гайнаўскага белліцэяў, якія вучацца ў беларускіх універсітэтах, закранула праблему перасячэння імі мяжы. Польскія і беларускія ўлады ведаюць аб гэтым, але сітуацыя не мяняецца. Спробай адмяніць склаўшуюся сітуацыю будуць сустрэчы з пагранічнікамі на ўзроўні Гродзенскай і Брэсцкай абласцей, якія паабяцаў сарганізаваць міністр замежных спраў РБ. Спадарыня Навіцкая выказала таксама надзею на дапамогу беларускага боку ў справе большай даступнасці да штодзённай беларускай прэсы, на што атрымала станоўчы адказ.

Пасол Сейма Яўген Чыквін накрэсліў сітуацыю жыхароў гарадоў і вёсак Падляшша, якія адчуваюць сябе горшымі з-за сваёй нацыянальнасці, на што Міхаіл Хвастоў адказаў: „Горшае пачуццё залежыць ад нас саміх, а гісторыя гэта пацвярджае. Паланізацыя ці русіфікацыя беларусаў гэта праблемы, якія заўсёды будуць існаваць па абодвух баках мяжы і толькі ад нас залежыць ці дазволім, каб яны нішчылі нашы карані”.

10-гадовая гісторыя супрацоўніцтва паміж Польшчай і Беларуссю не датычыць толькі палітыкі, бо гэта не адзіны напрамак, аб якім трэба гаварыць. Дадаць да гэтага трэба яшчэ развіццё культуры і паляпшэнне сітуацыі нацыянальных меншасцей. Распаўсюджванне і пашырэнне беларускага слова і песні цераз такое мерапрыемства як Фестываль беларускай песні памагае ў суседскіх кантактах. Гэтае меркаванне падтрымоўвае міністр Хвастоў, які заявіў, што ён ахвотны ўзяць ганаровы патранат над падобным мерапрыемствам польскай меншасці ў Беларусі.

Польска-беларускія ўзаемаадносіны будуць лепшымі, калі часцей будуць ладзіцца падобныя спатканні, сцвердзілі ўдзельнікі, якія маюць надзею на больш шчыльнае супрацоўніцтва. Кантакты з Беларуссю на палітычным і культурным узроўні давядуць да паляпшэння гаспадарчага становішча простых жыхароў Беларусі і Польшчы.