Прыгожыя песні, звонкія галасы

Янка ЦЕЛУШЭЦКІ

Падчас канцэрта выступіла 28 хораў, калектываў, вакальна-інструментальных гуртоў, дуэтаў і салістаў. Былі гэта лаўрэаты конкурсу „Беларуская песня 2002”, якія занялі месцы ад першага да трэцяга. Спявалі і танцавалі на сцэне таксама калектывы „Церніца” і „Чысты голас” з Мінска. Ахвотных паслухаць канцэрт было столькі, што ўсе не маглі змясціцца ў найбольшым зале ў Беластоку — спартыўным зале клуба „Влукняж”.

Вось яно як. Якое сумнае жыццё было б без блізкай сэрцу роднай песні. Песня таксама аб’ядноўвае людзей. Вялікая колькасць выканаўцаў, як і гледачоў сведчыць аб тым, што ў беларускім грамадстве існуе вялікае запатрабаванне на сустрэчы пры нагодзе такіх мерапрыемстваў ды знаёмства з культурнымі дасягненнямі. Цешыць факт, што да сваёй нацыянальнай беларускай культуры ўсё больш і больш схіляецца моладзь. Дзякуючы ёй ды яе творчым пошукам узбагачаецца традыцыйны рэпертуар. Беларуская культура становіцца больш жывучай ды набывае універсальны характар.

Канцэрт удастоілі, між іншым, міністр замежных спраў Польшчы Владзімеж Цімашэвіч, міністр замежных спраў Рэспублікі Беларусь — Міхаіл Хвастоў, епіскап Беластоцка-Гданьскі Іакаў, надзвычайны пасол РБ у Польшчы — Мікалай Крэчка, надзвычайны пасол РП у Беларусі — Марыюш Машкевіч, дэпутаты Сейма РП — Барбара Цірук, Аляксандр Чуж і Яўген Чыквін, сенатар Сяргей Плева, ваявода падляшскі — Марэк Стшалінскі, ваявода гродзенскі — Уладзімір Саўчанка, генеральны консул РБ у Гданьску — Міхаіл Аляксейчык, генеральны консул РБ у Беластоку — Леанід Каравайка, падляшскі куратар асветы — Зофія Транцыгер-Кочук, кіруючыя беластоцкімі аддзяленнямі Польскага радыё — Ежы Мушынскі і Польскага тэлебачання — Кшыштаф Юзвяк.

Усіх пачэсных гасцей, выканаўцаў ды шматлюдную публіку прывітаў старшыня Галоўнага праўлення БГКТ Ян Сычэўскі. Ён заявіў, што БГКТ будзе змагацца і не дапусціць, каб заняпала беларуская культура і песня на Беласточчыне. Меў ён на ўвазе апавяшчэнні пра скарачэнне датацый Міністэрства культуры нацыянальным меншасцям. Прачытаў ён ліст-пасланне да арганізатараў і ўдзельнікаў гала-канцэрта ад мітрапаліта Варшаўскага і ўсяе Польшчы Савы, які ў сувязі з важнымі душпастырскімі абавязкамі не мог прыехаць на гэты — як пісаў — цудоўны вечар беларускай культуры.

Афіцыйна гала-канцэрт адкрыў міністр Владзімеж Цімашэвіч. Ён абяцаў, што нягледзячы на крытычную сітуацыю бюджэту, нацыянальныя меншасці атрымаюць няшмат менш грошай чымсьці ў мінулым годзе. Усе ў зале ўспрынялі гэтыя словы бурнымі апладысментамі. Затым з кароткай прамовай выступіў міністр замежных спраў Беларусі Міхаіл Хвастоў. Ён сказаў м.інш. што ахвотна прыняў бы патранат над такім самым мерапрыемствам як вось гэты фестываль у Беластоку. Затым прачытаў пісьмо да беларусаў пражываючых у Польшчы, накіраванае ад імя ўрада Рэспублікі Беларусь.

... І пачаўся фестывальны канцэрт. Вялі яго Багуслава Карчэўская, Эва Ласкевіч, Алесь Лойка і Юрка Астапчук. Першы выступіў хор Гайнаўскага дома культуры з песняй „Прывітальная”. Паплылі цудоўныя лірычныя песні пра каханне, пра любоў да роднай старонкі, пра адвечную неразрыўную сувязь чалавека з прыродай і г.д. Песні фальклорныя і сучасныя. Усе яны выконваліся на высокім мастацкім узроўні і ў прыгожым сцэнічным афармленні. Захаплялі сваім майстэрствам чатыры хоры: хор Гайнаўскага дома культуры, бельскія „Васілёчкі” ды беластоцкія „Крыніца” і „Каласкі”, пяць эстрадных гуртоў: „Прымакі”, „Ас”, „Лідэр” і „Кошыкі” з Беластока ды „The Best” з Сямятыч, а таксама салісты і дуэты. Слухачы крычалі „біс” салісткам Марыі Врублеўскай з Гарадка і Дамініцы Цімашук-Баўтручук з „Пронару” ў Нарве ды эстрадным калектывам „Прымакі” і „Лідэр” з Беластока. Доўгімі авацыямі ўзнагародзілі выступленне найлепшага дуэта Багуславы Карчэўскай і Юркі Астапчука, які сёлета здабыў Гран-пры на фестывальных цэнтральных элімінацыях.

Якім жа цудоўным спевам заваражылі публіку мужчыны з калектыву „Чысты голас” з Беларусі! Усе ажно анямелі — сцішыліся, прагна лавілі мелодыю. Яны спявалі без акампанементу. Ён ім не быў патрэбны. У іх дык чыстыя галасы! Як прыгожа, як цікава! Нічога дзіўнага, што спевакам публіка падарыла самыя бурныя апладысменты.

Канцэрт завяршыла выступленне„Церніцы” з Мінска. Ансамбль слаўны дзявочымі галасамі і танцамі. Маладым замежным спевакам і танцорам гледачы падарылі мноства кветак.

На заканчэнне трохгадзіннага канцэрта ўсе артысты ды публіка стоячы праспявалі песню „Люблю наш край”. На тварах удзельнікаў фестывалю была радасць. У той сакавіцкі вечар беларускія песні яшчэ доўга луналі над беластоцкім жыллёвым пасёлкам „Антанюкоўскія сады”.