Юбілей пасольства

Аляксандр ВЯРБІЦКІ

Уводную інфармацыю зачытаў прэс-сакратар Пасольства Усевалад Глушкоў. Падкрэслівалася, што Польшча была адной з першых дзяржаў, якія прызналі суверэнітэт Беларусі. Сёння ў Рэспубліцы Беларусь працуе 305 суполак з польскім капіталам, дзейнічаюць 43 прадстаўніцтвы польскіх фірмаў, а польскія капіталаўкладанні вартыя 14 мільёнаў амерыканскіх долараў. Рашэнні Еўрасаюза адносна Беларусі абмежавалі магчымасці дыялогу і супрацоўніцтва паміж абедзвюма краінамі. Ізаляцыя не дала пажаданых вынікаў, не паспрыяла дэмакратызацыі.

На 2003 год прадбачваецца ўвядзенне візавага рэжыму для беларускіх грамадзян, у адказ на што Беларусь прадбачвае свае меры ў адносінах да грамадзян Польшчы. Гэта, вядома, пакладзе адбітак на прыгранічны гандаль, які цяпер састаўляе каля 15% усяго ўзаемнага тавараабароту. Пакуль што мяркуецца пра спрошчаныя працэдуры атрымання візаў прадпрыемцамі, перавозчыкамі і меншасцямі, аднак пра канкрэты гаварыць не прыходзіцца, бо польскі бок яшчэ не даў афіцыйнай інфармацыі пра планіраваныя новаўвядзенні.

Пасол Мікалай Крэчка прыгадаў, што гэтыя фармальныя новаўвядзенні павінны быць лагаднейшыя ад тых, якія прадбачвае пагадненне з Шэнгена. Ужо цяпер бізнесмены, якія дзейнічаюць у Беларусі, маюць візы. Віза для адзінкавага перасячэння мяжы сёння каштуе 5 ам. долараў і з увядзеннем візавага рэжыму чаўночны гандаль спыніцца; у мінулым годзе Польшчу наведала каля 6,5 мільёнаў грамадзян Рэспублікі Беларусь.

У кантэксце спадзяванага абвастрэння гранічнага рэжыму ўзнікаюць пэўныя праблемы звязаныя з аховай унікальнай Белавежскай пушчы. Паўстаў Еўрарэгіён, якому прадбачваецца спецстатус; праекты адпаведных дакументаў адпраўлены ўжо ў Брусель. Еўрасаюз адводзіць вялікую ролю добрым адносінам з суседзямі, таму ёсць надзея, што будзе лепш. Мы — суседзі і нам наканавана супрацоўніцтва, — завяршыў Мікалай Крэчка.