Цікавей чым год назад

Аляксей МАРОЗ

— Мэта нашага конкурсу — папулярызацыя беларускай мовы сярод вучняў, — заявіў Ян Карчэўскі, настаўнік беларускай мовы з белліцэя, які адкрыў мерапрыемства, прывітаў расказчыкаў, іх апекуноў і гасцей.

На адкрыцці конкурсу былі прысутны дырэктар белліцэя Яўген Сачко, настаяцель прыхода св. Дзмітрыя Салунскага ў Гайнаўцы айцец Георгій Ацкевіч, сакратар Павятовага аддзела БГКТ у Гайнаўцы Міхал Голуб і настаўнікі беларускай мовы з вучнямі.

Першымі выступілі вучні падставовых школ, якія свае расказы абапіралі на мастацкіх творах. Больш уласнай інтэрпрэтацыі паявілася ў расказе Наталлі Раманчук з Падставовай школы ў Нараўцы, якой камісія (Наталля Герасімюк — старшыня, Міхал Андрасюк і Міраслава Лукша — члены) прызначыла першае месца. Кацярына Філіпюк з Падставовай школы ў Дубінах цікава расказвала ад сябе, што заўважылі члены журы і атрымала яна другое месца. Трэція месцы атрымалі Ева Мароз з Падставовай школы н-р 3 у Гайнаўцы і Паўліна Ігнацюк з Падставовай школы н-р 6 у Гайнаўцы. Пасля расказвалі гімназісты, якія часта карысталіся гаворкай. У катэгорыі гімназістаў выступіў ажно 21 удзельнік. Найбольш з Нарвы і Чыжоў — яны прымаюць удзел у конкурсе гавэнды ўжо трэці раз. Першыя месцы занялі Паўліна Пашко з Гімназіі ў Нарве і Анэта Трафімюк з Гімназіі ў Чыжах, якія на гаворцы і літаратурнай мове жартоўна расказвалі пра вясковае жыццё, высмейваючы заганы сялян. Барбара Трафімюк з Гімназіі ў Дубічах-Царкоўных расказала на дубіцкай гаворцы пра смешныя здарэнні з жыцця Колі — жыхара вёскі. Дзяўчаты амаль не рабілі моўных памылак і правільна эмацыянальна інтэрпрэтавалі расказы. Трэція месцы атрымалі Ева Русіновіч з Гімназіі ў Нарве і Пётр Янчук з Гімназіі ў Чыжах. У катэгорыі ліцэістаў выступілі толькі тры вучаніцы і яны раздзялілі паміж сябе першыя месцы. Несумненна самым лепшым быў расказ Наталлі Зофіі Лемеш, якая раней перамагала ў дэкламатарскіх конкурсах. Успамінала яна пра свае выезды да бабулі і дзядулі, якія жылі ў Старым Беразове. Яна трапна пераказвала свае перажыванні з выкарыстаннем адпаведных фанетычных прыёмаў і жэстаў. Другое месца заняла Бэата Мінько, жартоўна расказваючы пра вясковае жыццё, а трэцяе — Маргарыта Карпюк, успамінаючы вясковых бабулек.

— Я думала, што ў час расказу пабачу як публіка ўспрымае маё выступленне, але калі пачала гаварыць забыла аб усім і не бачыла, што вакол дзеецца. Пра свой расказ не гаварыла бацькам, бо ён інтымны і тычыцца маёй сям’і, — заявіла пасля выступлення Наталля Лемеш.

Пасля выступленняў расказчыкаў усіх удзельнікаў конкурсу і іх апекуноў арганізатары запрасілі на абед і выступленне школьнага калектыву „Знічка”. Дырэктар Яўген Сачко, выступаючы пасля ўручэння ўзнагарод для найлепшых расказчыкаў і дыпломаў для ўсіх удзельнікаў, моцна акцэнтаваў патрэбу вучобы беларускай мове.

— У гэтым годзе вучні падбіралі тэксты для расказу цікавейшыя чым год назад. Цікавы спосаб пераказвання зместу верша, таксама, можна было палічыць як гавэнду. Відаць было, што вучні і настаўнікі зразумелі, што гэта гавэнда, — паінфармавала старшыня камісіі Наталля Герасімюк.

Настаўнік беларускай мовы Ян Карчэўскі, галоўны арганізатар конкурсу, дзякаваў за дапамогу дырэкцыі, настаўніку гісторыі Яўгену Янчуку і вучням белліцэя. Спонсарамі і фундатарамі ўзнагарод выступілі Гайнаўскае староства, бурмістр горада Гайнаўкі, Гайнаўскі аддзел БГКТ, гурт „Гоман”, Бацькоўскі камітэт белліцэя, паэтэса Міра Лукша і бібліятэка Беларускага музея.