Крытычна дзеля прагрэсу

Міхась КУПТЭЛЬ

Фактычна, цяжка змяніць сваю жыццёвую сітуацыю, калі чалавек уладкаваўся ў гарадской кватэры, прывык да, як не кажы, лепшага чым на бацькавай гаспадарцы, жыцця. Астаецца затым настальгія па мінулым і чаканне, што нехта зменіць нам лёс.

Разумею, што Антось — гэта працаздольны мужчына, здаровы, прыгнечаны беспрацоўем. Думаю, Антось мог бы звярнуцца, напрыклад, да магутнай беларускай арганізацыі БГКТ за дапамогай. Пішу зусім не іранічна і не аплёўваючы БГКТ — магутную арганізацыю, бо калі саміх дэлегатаў на з’езд выбрала яна 90, то арганізацыя не малая, статыстыка не хлусіць.

Вельмі ўважліва прачытаў я інфармацыю М. Хмялеўскага са з’езда БГКТ і не дачытаўся чым БГКТ зоймецца ў будучыні, бо ў мінулым, вядома, жабрацкім лёсам беспрацоўных не займалася. Апрача 79 дэлегатаў у з’ездзе ўдзельнічала больш за 51 госць. Можна дадумацца, што гэта вярхушка гмінна-павятовай улады Падляшскага ваяводства. З чым яны прыбылі на з’езд? З якімі прапановамі? Ці толькі з нараканнямі? Калі яна не ў змозе дапамагчы Антосю, то хто? Чаму ніхто на з’ездзе такіх пытанняў не ставіў? Нагода была, каб публічна запытаць улады пра „жабрацтва” беларусаў.

На XIV з’ездзе БГКТ Ніна Цыванюк — дэлегатка з Гарадка патрабавала вярнуць „Ніву” БГКТ. Пытаю, ці БГКТ мела „Ніву”, каб цяпер трэба было яе вяртаць? „Ніву” выдае Праграмная рада тыднёвіка і мае на гэта прававое ўстанаўленне, з усімі законнымі паслядоўнасцямі і не можна, от так сабе, па-бальшавіцку, „вярнуць” „Ніву”, не парушаючы законаў. Але ёсць магчымасць „вярнуць” „Ніву” шырэйшаму колу беларусаў Польшчы. Калі я пісаў свае крытычныя заўвагі пра „Ніву”, думаў, што адазвуцца чытачы, карэспандэнты, дзеячы не толькі БГКТ, але і іншых 18 беларускіх арганізацый. І не дзеля аплёўвання „Нівы” пісаў я крытычна, але дзеля прагрэсу. Дыскусіі вялікай не было, з боку БГКТ ніхто не адазваўся. А можа „Ніва” не хоча друкаваць поглядаў дзеячаў БГКТ? Нічога аб гэтым М. Хмялеўскі ў справаздачы са з’езда не піша. Значыць, дэлегаты на гэта не наракалі.

Шкада, што члены БГКТ не пішуць у „Ніву”, не ўсе ж маюць погляды згодныя з меркаваннямі А. Лепэра на рэчаіснасць, і не ўсе ж думаюць як Я. Сычэўскі ці А. Лукашэнка. Усе скарысталі б з адкрыўчых думак, не толькі пастаянных і шматгадовых карэспандэнтаў „Нівы. Пішыце, братцы ў „Ніву”! Яна ж — тыднёвік беларусаў у Польшчы.