Перамагалі белліцэісты і іх трэнер

Аляксей МАРОЗ

Вучні з Бельскага белліцэя Яўгенія Маёрава і Тамаш Белаказовіч у 2000/2001 школьным годзе занялі першыя месцы ў адкрытым чэмпіянаце Падляшскага ваяводства па скачках з шастом і сталі фіналістамі ў чэмпіянаце Польшчы ў гэтай самай канкурэнцыі. Лукаш Кастэцкі ў 2001 годзе стаў чэмпіёнам Падляшскага ваяводства па скачку ў вышыню ў спаборніцтвах у спартзале, арганізаваных у Супраслі.

Андрэй Карчэўскі ў чэмпіянаце Польшчы інвалідаў займаў: першае месца па яздзе на калясцы на адлегласць 200 метраў, другія месцы па кіданні дыска і штурханні ядра ды трэцяе месца па кіданні капя. Хлопцы і дзяўчаты з белліцэя, выступаючы ад школьнага клуба „Пагоня” ў 2000 годзе занялі першыя месцы ў Павятовых лёгкаатлетычных спаборніцтвах, арганізаваных у Бельску-Падляшскім. Каманда з белліцэя перайшла ў фінал Ваяводскай лёгкаатлетычнай лігі і будзе змагацца сярод дванаццаці найлепшых камандаў. Белліцэісткі былі чэмпіёнамі Бельскага павета ў спаборніцтвах па валейболе і зараз іграюць у ІІ Валейбольнай ваяводскай лізе. Хлопцы з клуба „Пагоня” два разы займалі другія месцы ў Павятовых спаборніцтвах па баскетболе, увайшлі ў ІV Баскетбольную ваяводскую лігу, але калі тая была распушчана — змагаюцца за ўваход у ІІІ лігу, а Лукаш Кучынскі з’яўляецца зараз членам малодшай юнацкай зборнай Польшчы.

— Спадзяюся я, што ў гэтым годзе прыйдзе да нас вучыцца чэмпіёнка Польшчы па скачку ў вышыню, цяперашняя гімназістка Каміла Стэпанюк, з якой я зараз займаюся. Каманду валейбалістак павінны папоўніць добрыя ігракі з гімназій і можна будзе думаць пра ўваход у першую валейбольную лігу, — паінфармаваў настаўнік Яўген Бэдэнічук. — Усе вучні белліцэя выступаюць на спартыўных спаборніцтвах ад школьнага клуба „Пагоня”, якога названне запрапанавала нам дырэктар Зінаіда Навіцкая. Клуб наш з фонду „Старт” атрымаў спартыўныя прылады, якімі могуць карыстацца вучні рыхтуючыся да спаборніцтваў для інвалідаў.

Трэнер бельскіх белліцэістаў Яўген Бэдэнічук, родам з Ляхоў каля Кленік, выступаючы ў трайным скачку ў чэмпіянаце Еўропы ў Спліце ў 1990 годзе заняў адзінаццатае месца, у чэмпіянаце свету ў Токіо ў 1991 годзе чатырнаццатае месца (на 47 асоб) і ў Алімпіядзе ў Барселоне ў 1992 годзе — дванаццатае месца (на 54 асобы). Самы лепшы рэзультат Яўгена Бэдэнічука ў трайным скачку — гэта 17,08 метра, які з’яўляецца трэцім рэзультатам у Польшчы і найлепшым у нашым ваяводстве. Пазней кідаў ён кап’ём і скакаў на адлегласць, а найлепшы яго рэзультат у скачку, гэта 7,61 метра, які быў самым лепшым рэзультатам у ваяводстве.

— Да выступлення ў Барселоне быў я падрыхтаваны, але хваляванне перашкаджала, — успамінаў Яўген Бэдэнічук. — У час маіх выездаў пабываў я ў цікавых краінах, засталося многа ўспамінаў і перажыванняў. Усё тое, што бачыў, маё. Засталіся, таксама, прыклады, як трэба займацца, каб былі добрыя вынікі.