Ніва № 7 (2388), 17 лютага 2002 г.

Аб Іерусаліме і Гайнаўшчыне

Аляксей МАРОЗ

Дні Іерусаліма ў Белавежскай пушчы, якія праходзілі 1 і 2 лютага 2002 года ў Гайнаўцы і яе наваколлі, маглі адбыцца дзякуючы інтэрнэтавай старонцы „Віртуальная Гайнаўка”, якую вядзе Прадпрыемства камп’ютэрных паслуг „Софт — ас Анатоль Швед” з Гайнаўкі. Першым на інтэрнэтавыя інфармацыі аб Гайнаўцы адгукнуўся фатограф Моцці Ліпэль з Ізраіля, якога бацькі выводзіліся з Гайнаўкі. Пасля разам з сябрамі даслалі ў Гайнаўку фатаграфіі аб Іерусаліме. Калі ў арганізацыю выстаўкі ўключыліся ўлады Саюза гмін Белавежскай пушчы, мерапрыемства пераўтварылася ў Дні Іерусаліма. Адкрыццё ў Гайнаўцы выставак: фатаграфічнай „Іерусалім” у гатэлі „Ажахоўскі” і мастацкай „Інтэграцыя культур” у Беларускім музеі спалучана было з прэзентацыяй інфармацый аб Іерусаліме і Гайнаўшчыне. Арганізатарамі мерапрыемства, у якім удзельнічалі госці з Ізраіля, бурмістр Гайнаўкі і войты гмін Гайнаўшчыны, былі прадпрыемства „Софт — ас Анатоль Швед”, Таварыства польска-ізраільскай дружбы і Саюз гмін Белавежскай пушчы.

На адкрыццё выстаўкі „Іерусалім” у гатэль „Ажахоўскі” прыйшло многа людзей зацікаўленых старажытным горадам. Прадпрымальнік Анатоль Швед і Іаанна Бранская, сакратар Таварыства польска-ізраільскай дружбы, адзначылі шматнацыянальнасць і шматкультурнасць Іерусаліма, што адлюстраванае было на фатаграфіях. Побач яўрэяў на здымках відны былі арабы і турысты іншых нацыянальнасцей, людзі розных прафесій. Сфатаграфаваны былі мячэць Амара і царква св. Марыі Магдаліны. Фатаграфіі роблены былі ў старой частцы Іерусаліма і на старых будоўлях відаць дэталі розных культур. Гайнавяне заслухалі расказ аб Іерусаліме на польскай і габрэйскай мовах і яўрэйскія песні. Прысутных частавалі характэрнымі яўрэйскай кухні стравамі.

Другі дзень польска-ізраільскага мерапрыемства арганізаваны быў Саюзам гмін Белавежскай пушчы і распачаўся з прэзентацыі Белавежскай пушчы, Гайнаўкі і навакольных гмін. Бурмістр Гайнаўкі і войты суседніх гмін расказвалі пра гаспадарчыя ўмовы развіцця рэгіёна, знаёмілі з яго гісторыяй і турыстычнымі атракцыёнамі, заахвочваючы гасцей да прыезду на Гайнаўшчыну.

Пасля госці з Ізраіля наведалі Свята-Троіцкі сабор у Гайнаўцы і Беларускі музей, дзе адбылося адкрыццё мастацкай выстаўкі „Інтэграцыя культур”, аб якой інфармаваў трохмоўны надпіс: на беларускай, польскай і габрэйскай мовах. Мастакі з Варшавы, якія ўдзельнічалі ў пленэрах у Іерусаліме і на Гайнаўшчыне, побач створаных у Новаберазове і Дубічах-Царкоўных прац, паказалі на карцінах старую архітэктуру Іерусаліма, жыццё ў гэтым горадзе і расліннасць характэрную гэтаму рэгіёну. На выстаўцы прадстаўлены таксама алейныя карціны Пётра Гагана з Гайнаўкі, які займаўся арганізацыяй выстаўкі і графіка Эдуарда Агуновіча з Мінска, які рыхтуе пастаянную экспазіцыю ў музеі. У час адкрыцця выстаўкі беларускія песні спяваў хор Гайнаўскага дома культуры.

Каб паказаць Белавежскую пушчу, арганізатары завезлі ўдзельнікаў мерапрыемства ў Звярыны запаведнік, а пасля павезлі ў Дубічы-Царкоўныя на выстаўку народнага рукадзелля. Там госці спаткаліся з мясцовымі творцамі, паспрабавалі дубіцкія стравы і закончылі спатканне ля вогнішча.