Гайнаўка аказала многа сэрца

Міхал МІНЦЭВІЧ

Пра ўражанні ад удзелу ў акцыі расказваюць валанцёры з I Агульнаадукацыйнага ліцэя і арганізатары акцыі:

Дамінік Анціпаў: — У акцыі ўдзельнічаю многія гады разам з сябрамі Каролем Бужынскім, Кшыштафам Закшэўскім, Дыянай Дымэцкай (сабрала найбольш — 350 зл.), Малгажатай Буйноўскай, Аннай Зыскоўскай, Касяй Пух і іншымі. У гэтым годзе людзі давалі мне крыху менш грошай чым у мінулым.

Кася Пух: — Што людзі гаварылі ў горадзе? Некалькі асоб сказала, што многа з сабраных грошай пэўна Оўсяк забірае.

Малгажата Буйноўская: — Сабралі мы поўную скарбонку грошай і многа загранічнай валюты. Я такая змучаная, перамёрзлая, але задаволеная.

Зіновій Галёнка: Арганізатарам „Аркестра” былі мы таксама і ў мінулым годзе, але тады было больш клопатаў, таму што мы не ведалі, як гэта рабіць. Былі клопаты з прыцягненнем дарослых асоб, з афармленнем банкаўскага рахунка, многа разоў даводзілася хадзіць па розных установах, якія абяцалі падтрымку, а потым адмаўляліся, таксама было з абяцаннямі некаторых фірм.

У гэтым годзе вырашылі мы спрасціць працэдуру і разлічваць толькі на сябе. Зрэшты, Управа горада адмовіла нам месца ў парку на вогнішча. Надлясніцтва таксама не дазволіла сарганізаваць яго ў лесе.

Хачу падкрэсліць, што ў акцыі Вялікага аркестра святочнай дапамогі ўдзельнічае персанал рэстарана „Белая ружа”. Працаўнікі хадзілі па горадзе збіраць грошы, працавалі ў камісіях пры іх лічэнні і ў кухні рыхтавалі ежу для валанцёраў. Што з гэтага мае рэстаран? Немалыя кошты. Мы, менавіта, даход з Сільвестра 13 студзеня, які адбыўся ў рэстаране, прызначылі на аплату аўтобуса, на якім валанцёры з сабранымі грашыма паехалі ў Беласток, падрыхтавалі пачкі з харчамі на дарогу, а таксама на месцы частавалі бігасам, кавай, гарбатай, напоямі, закупілі феерверкі, каб пусціць аганёк у неба.

Кшыштаф Чарнэцкі: — Моладзь традыцыйна ўдзельнічае ў акцыі, але немагчыма было б ім правесці яе самім. Таму дапамагаем. Гэта вучні ўсіх гайнаўскіх сярэдніх школ і некалькі гімназістаў.

Гайнаўка становіцца бяднейшым горадам і тое відаць, калі людзі даюць і ахвотна, але меншыя даткі. Трэба сказаць, што многія заводы і ўстановы не могуць даць грошай, але ахвотна ахвяроўваюць сваю прадукцыю ці дапамогу. Ім лягчэй даць фанты і таму арганізуем другую частку Вялікага аркестра. Адгукнуліся фірмы: „Рунь”, ПСС, Прафсаюзы з „Фурнела”. Завод „Фурнел” у мінулым годзе падарыў дзве шафы і два вялікія мяккія крэслы, аптэкі давалі касметыку, мастакі — карціны. Падобна ёсць і ў гэтым годзе. Карціны мастакоў з нашага раёна прадаюцца на аўкцыёне, а фанты разыгрываюцца на латарэі. Перад публікай выступіла кабарэ „Відэлец” з Беластока. Тое, што мы робім ляжыць у кампетэнцыі Дома культуры. На жаль, у мінулым годзе, каб зняць залу, патрэбна было рашэнне бурмістра. — У гэтым годзе мы адмовіліся. Сёлета гайнаўскі аганёк у неба паехаў у Беласток, таму што ў Гайнаўцы не было як яго пусціць. Ва Управе горада патрабавалі ў гэтай справе падаць заяву. Хацелі мы зрабіць вогнішча ў парку альбо ў лесе, спячы на ім каўбаскі і пусціць у неба пару феерверкаў. Не было дазволу і гайнаўскія ракеты паляцелі ў неба ў Беластоку.

Абедзве сёлетнія дабрачынныя акцыі (13 і 29 студзеня) прайшлі паспяхова. У першым туры ўдалося сабраць больш за 10 тысяч злотых, у другім — столькі ж. У другім туры Вялікага аркестра фінансавы бок мерапрыемства падтрымалі канцэрты маладзёжных гурткоў з Гарадка і Бельска 27 студзеня ў Гайнаўскім доме культуры (залу зняла моладзь, а кошты найму гукаўзмацняльнай апаратуры пакрылі бурмістр і стараста). 29 студзеня адбыўся аўкцыён карцін ды вырабаў рамеснікаў з Гайнаўкі і латарэя (білету ўступу за 5 зл. адпавядаў нумар фанта). У падліку грошай дапамагала бухгалтар „Белай ружы” Рамуальда Каспшак, а бяспеку гарантавала ўчастковая Павятовай камендатуры паліцыі ў Гайнаўцы Дарота Карчэўская.

— Хачу сказаць, — адзначыў Зіновій Галёнка, — што акцыя Вялікага аркестра святочнай дапамогі ў Гайнаўцы праводзілася па-над усялякімі падзеламі, не было разрозненняў тыпу католік ці праваслаўны, не было падзелу сярод вучняў на школы, а дзеці ахвотна заяўлялі аб удзеле ў акцыі. Я сам не адчуваю стомы. Менавіта моладзь узняла мяне на духу. Яна даказала, што варта ў Гайцнаўцы штосьці рабіць. А грамадства горада, у якім вялікае беспрацоўе, дало на 40 працэнтаў больш грошай чымсьці ў мінулым годзе.