Перадз’ездаўскі пленум

Міхась ХМЯЛЕЎСКІ

Інфармацыю аб справаздачна-выбарчай кампаніі ў звеннях БГКТ прадставіла сакратар ГП Валянціна Ласкевіч. На Беласточчыне выбрана 82 дэлегаты на XIV З’езд БГКТ, які адбудзецца 18 лістапада. Восем дэлегатаў прыпадае на Варшаву і Гданьск. Там справаздачна-выбарчыя канферэнцыі адбудуцца ў пачатку лістапада. Затым старшыня ГП Ян Сычэўскі інфармаваў дэлегатаў аб выкананні пастановы XIII З’езда БГКТ, які адбыўся 30 лістапада 1997 года. Ад гэтага часу значна ўзрос ранг многіх БГКТоўскіх мерапрыемстваў, у тым ліку фестывалю беларускай песні, „Купалля” ў Белавежы, Свята беларускай культуры ў Беластоцкім амфітэатры, „Сяброўскай бяседы” ў Гарадку і „Музычных дыялогаў” у Мельніку.

Немагчымым да выканання быў 5 пункт пастановы: „Спрыяць паяднанню і супрацоўніцтву паміж беларускімі арганізацыямі ў Польшчы”. Таксама як 6 пункт, які датычыў супрацоўніцтва з прадстаўнікамі сродкаў масавай інфармацыі. Іх варожасць да БГКТ перш за ўсё да старшыні ГП праявілася падчас выбарчай кампаніі ў Сейм за тое, што ён у Мінску сказаў крышку праўды аб прыватызацыі ў Польшчы.

Уладзімір Юзвюк засяродзіўся на ўдзеле членаў Прэзідыума ГП у пасяджэннях. Найбольш адсутнічаў Яўген Сачко, які так моцна імкнуўся быць членам Прэзідыума ГП, а пасля двух пасяджэнняў больш не паявіўся. Не прыязджаў на пасяджэнні Прэзідыума ГП Ірыней Лаўрашук, але ён заявіў, што з-за вялікай занятасці не мае магчымасці выконваць абавязкі члена Прэзідыума ГП. Уладзімір Юзвюк аднёсся да гучнай справы дэпутата Сейма Яна Сычэўскага, які ў Мінску лёгка закрануў спосабы прыватызацыі ў Польшчы. Замест уступіць з ім у дыялог, СМІ і палітыкі сталі яго таптаць. Калі ўжо ён не адпавядаў для СЛД, магло яно ў рэшце рэшт звярнуцца да БГКТ, з якім падпісана была дамова аб падтрымцы, каб замяніць Сычэўскага другім дзеячам. А так СЛД ударыла нас па мяккім месцы, — сказаў Уладзімір Юзвюк.

— І балюча, і крыўдна, і сорамна нам, беларусам, што СЛД паступіў так з Янам Сычэўскім. А прадстаўнікоў СЛД мы так сардэчна віталі, але пасля гэтага, што сталася з Сычэўскім, у асноўным з прычыны СЛД, мы не прыйшлі на спатканне з імі, — сказала Ніна Цыванюк. — Мы не ўмеем сябе шанаваць. Радыёперадачы, тэлебачанне, прэса аплёўваюць беларускія ўлады і прыхільнікаў Беларусі. А ўкраінцы і літоўцы так не паступаюць. „Ніва” таксама робіць работу не для беларусаў. Я часта бываю ў Беларусі. Усё гэта не так, як прадстаўляюць, — працягвала Ніна Цыванюк.

Міхась Голуб выступіў у абароне Яўгена Сачко, які штудзіруе на завочным аддзяленні і не мае часу ў нядзелю прыязджаць на пасяджэнні ГП. Далей гаварыў ён аб самастойнай працы аддзела, аб арганізацыі выступленняў паасобных калектываў:

„Мы не глядзім на тое, хто якой арыентацыі, правай ці левай, для нас важнае тое, каб ён уключаўся ў нашу дзейнасць”.

Кастусь Масальскі прапанаваў рабіць сустрэчы з паслом і консулам РБ, каб мець больш інфармацыі аб Беларусі.

Хведар Галёнка ініцыятыву СЛД перавесці Яна Сычэўскага з паслоў у сенатары, а пасля зрабіць яго незалежным кандыдатам назваў дыскрымінацыяй. СЛД парушыла паразуменне з БГКТ адносна падтрымкі „лявіцы”. СЛД не правяло з БГКТ аніякай кансультацыі ў гэтай справе.

Далей Хведар Галёнка прапанаваў пачыніць намаганні аб стварэнні сваёй газеты, аб звароце „Нівы”, якую Багуміла Бэрдыхоўская забрала ад БГКТ. Далей гаварыў ён аб патрэбе пабудовы магутнага перадатчыка, каб беларусы маглі прымаць перадачы з Беларусі.

Зінаіда Навіцкая, дырэктар Беларускага ліцэя ў Бельску пераконвала, што двух ліцэяў замала, каб выхоўваць моладзь у беларускім духу, што найважнейшымі выхаваўцамі з’яўляюцца бацькі.

Антон Семянко звярнуўся да консула з просьбай, каб калектыў „Крыніца” мог выязджаць на гастролі далёка па-за Гродна.

Консул Ігар Сякрэта, адказваючы на пытанні, сказаў, між іншым, што пакуль што няма ані праўнай, ані фінансавай магчымасці ўтварэння спецыяльнага канала перадач для беларусаў Беласточчыны. Пасля члены пленума ГП абмяркоўвалі праект зменаў у статуце БГКТ, які прадставіў Хведар Галёнка.

* * *