Патрыярх Павел у Гайнаўцы...

Аляксей МАРОЗ

Першымі патрыярха Паўла віталі епіскап Гайнаўскі Міран і прыбылыя ў сабор святары. Пасля вучні прывіталі на беларускай мове патрыярха, мітрапаліта Саву і прыбылых з імі гасцей. Яны папрасілі памаліцца за праваслаўную моладзь, беларускі народ і паблаславіць іх на жыццёвы шлях. Ад імя жыхароў Гайнаўкі патрыярха прывітаў бурмістр Анатоль Ахрыцюк, пасля чаго ўсе падаліся ў храм.

Пасля кароткага багаслужэння да гайнаўскіх вернікаў са словамі падзякі за гасціннасць звярнуўся сам патрыярх. У яго кароткім выступленні не было ні палітычных разважанняў, ні нараканняў, а ўсяго задума над сэнсам жыцця. Ён прасіў, каб людзі не выбіралі простых і лёгкіх дарог у жыцці, але шукалі нябеснага збаўлення. Сказаў, што такой дарогі шукалі сербы ў час 500-гадовай турэцкай акупацыі і гэта дапамагло ім выстаяць у праваслаўі. Патрыярх сказаў таксама пра цяперашнія пакуты сербаў, якіх мусульмане выганяюць са сваёй зямлі. Больш пра знішчэнні ў Сербіі сказаў епіскап Гайнаўскі Міран, які двойчы там быў. Звярнуўся ён да патрыярха са словамі спачування сербскаму народу, згадваючы, што гайнавяне моцна перажывалі, калі на Сербію падалі бомбы ды маліліся за аблягчэнне гэтых пакут. На заканчэнне ўладыка Міран папрасіў малітваў за гайнавян, якія ў гэтым годзе святкуюць 50-годдзе існавання горада.

— Калі глядзіш на пакорлівага патрыярха Паўла, адчуваеш яго вялікую духоўнасць і малітоўнасць, — заявіў адзін з вернікаў. — Думаю, што Сербія і зараз падпіраецца яго малітвамі. Вялікая ласка сыходзіць і на нашу Царкву праз блаславенне такога падзвіжніка.

Патрыярх падараваў Свята-Троіцкаму сабору ў Гайнаўцы крыж і атрымаў ад гайнавян чашу. Яго выхад з сабора суправаджаўся царкоўнымі песнямі, святарствам, дзецьмі, моладдзю і дарослымі. На сустрэчу прыйшлі таксама вучні гайнаўскіх пачатковых школ разам з настаўнікамі Закону Божага.

— Я меў нагоду пазнаёміцца з патрыярхам Паўлам раней, калі разам з дэлегацыяй Польскай аўтакефальнай праваслаўнай царквы ездзіў у Сербію з дапамогай ад нашых праваслаўных вернікаў. Тады патрыярх прыняў нас і сказаў, што варожыя сілы свету выступілі супраць Сербіі. Былі мы на чацвёрты дзень пасля спынення бамбардзіроўкі, наўсцяж бачылася разбурэнне. Нашы праваслаўныя людзі асабліва разумеюць пакуты сербаў, бо старэйшыя памятаюць яшчэ вайну. Ніколі раней не было такой ахвярнасці нашых вернікаў, як у час дапамогі сербам пасля бамбардзіроўкі іх краіны, — успомніў благачынны Гайнаўскага дэканата Міхаіл Негярэвіч. — Я і многія свяшчэннікі пад вялікім уражаннем моладзі з белліцэя, якая так прыгожа павітала патрыярха і дзякую ўсім вучням, настаўнікам і дырэкцыі за такі актыўны ўдзел у нашай сустрэчы.