Ніва № 40 (2369), 7 кастрычніка 2001 г.

Крыху страху і ўсё

Паўліна ШАФРАН

18 і 19 верасня вучні чацвёртых класаў бельскага белліцэя прыступілі да пробных экзаменаў на атэстат сталасці. У першы дзень былі тэсты па матэматыцы. Вучні не мелі з імі цяжкасцей, але здзівіла іх, як і саміх настаўнікаў, тэматыка задач, пяць з якіх датычыла грошай. У адной задачы, напрыклад, трэба было вылічыць курс маркі і долара ў канторы. Узнікла пытанне, каму накіроўваюцца гэтыя тэсты — лекарам, архітэктарам ці маклерам?

На другі дзень вучні здавалі замежныя мовы. Большасць з іх выбрала рускую мову, а каля 20 асоб пісала з англійскай. Гэты экзамен таксама быў няцяжкім. Складаўся ён з трох частак. У першай трэба было выслухаць з плёнкі тэкст, а потым адказаць на пытанні. Другая частка — гэта чытанне тэксту і таксама адказы на пытанні. На заканчэнне трэба было напісаць два кароткія сачыненні на пастаўленыя ў тэстах тэмы.

Зусім па-новаму выглядала ацэнка прац. Кожная праца была зашыфравана, а вучань меў свой нумар. Гэтак, з большага, усё выглядала з фармальнага боку. А як сябе адчувалі вучні? Усяляк. Агульна, аднак, адчуваўся невялікі страх. Ад канікул прайшло толькі два тыдні і ніхто не меў ні часу, ні ахвоты падрыхтавацца да экзамену. Моладзь спадзявался, што калі выбары выйграе кааліцыя СЛД-УП, то застанецца старая матура, да якой яны рыхтаваліся тры папярэднія гады. Мешаныя ўражанні былі ў моладзі ля экзаменацыйных залаў.

— Папярэднія матурысты былі ў лепшай сітуацыі, — сказаў Эміль Корчак. — Ведалі, што іх чакае, як рыхтавацца да экзаменаў. З намі інакш.

Другі вучань, Давід Вакулеўскі, сцвердзіў, што сёлетнія матурысты знаходзяцца ў няпэўнасці — ніхто не ведае як рыхтавацца да экзаменаў. Падобныя пачуцці і ў бацькоў матурыстаў, якія з непакоем спаглядаюць у будучыню, не ведаючы, што чакае іх дзяцей.

— Крыху надзеі, — адзначыў Лукаш Шафран, — у справе старой матуры даў Владзімеж Цімашэвіч, які нядаўна наведаў наш ліцэй. Калі б да ўлады прыйшла кааліцыя СЛД-УП, то матура выглядала б па-старому.

Гэты візіт падбадзёрыў вучняў і пашырыў прыхільны кааліцыі электарат.

Пытанне з матурай нявырашанае да гэтай пары і, як сцвярджае дырэктар ліцэя Зінаіда Навіцкая, настаўнікі і вучні крыху баяцца новага экзамену. Цяжкасці былі з экзаменам па рускай мове, бо праводзіць яго трэба было ў спартыўнай зале „тройкі” — сабралася там агулам пад 100 асоб — праблемай была акустыка і брак апаратуры, якая дазволіла б агучыць тэкст. Апаратурай дапамог Бельскі дом культуры. Экзамены аказаліся няцяжкімі, вучні выходзілі з залы з усмешкамі. Адзін этап жыцця за імі. Цяпер застаецца чакаць „стаднёўку”, бо пасля яе трэба моцна ўзяцца за работу. Асабіста добра разумею непакой моладзі і маю надзею, што ўсё-такі будуць яны здаваць па старых прынцыпах. Большасць настаўнікаў таксама падзяляе гэтае спадзяванне.