Ніва № 37 (2366), 16 верасня 2001 г.

Выбарчыя вынікі

„Можна павіншаваць з абраннем на другі тэрмін прэзідэнта Рэспублікі Беларусь Аляксандра Рыгоравіча Лукашэнку”, — заявіла 10 верасня а гадзіне 4 раніцы ў прамым эфіры Беларускага тэлебачання старшыня Цэнтральнай выбарчай камісіі Лідзія Ярмошына. Паводле папярэдніх даных у выбарах удзельнічала 83,85% упаўнаважаных грамадзян. Агулам па ўсёй краіне Аляксандр Лукашэнка атрымаў 75,62% галасоў, Уладзімір Ганчарык — 15,39%, а Сяргей Гайдукевіч — 2,48%.

Сімпатыкі апазіцыі чакалі аб’яўлення вынікаў на мітынгу ў цэнтры Мінска. На Кастрычніцкай плошчы сабралася 5 тысяч асоб, якія скандзіравалі „Свабода, свабода!”. Галоўны сапернік цяперашняга прэзідэнта Уладзімір Ганчарык абвінаваціў улады ў сфальшаванні вынікаў галасавання. „Улады зрабілі фальсіфікацыю ў карысць Лукашэнкі, — сказаў ён. — Гэты рэжым павінен адказаць за фальсіфікацыю перад законам і народам”. Прамоўца назваў шматлікія парушэнні выбарчага закону. На мітынгу прысутнічалі спецпадраздзяленні АМАПа, але не інтэрвеніравалі.

За гадзіну пасля закрыцця выбарчых участкаў былі адключаны тэлефоны ў прэс-цэнтрах арганізацый незалежных наглядальнікаў, якія намагаліся правесці паралельны з афіцыйным падлік галасоў. Замоўклі тэлефоны ў офісах кааліцыі „Незалежны наглядальнік”, мінскай і гомельскай сядзібах праваабарончага цэнтра „Вясна”. Недаступнымі ў дзень галасавання былі інтэрнэтавыя старонкі апазіцыйных арганізацый.

Паводле ПАП і Радыё Рацыя