Свята ў Зэльве

Зміцер КІСЕЛЬ

11 жніўня ў Зэльву прыехалі каля ста чалавек з Гродна, Слоніма, Свіслачы, Бераставіцы, Брэста і Мінска. А 12 гадзіне ў мясцовай царкве адбылося набажэнства ў гонар Ларысы Геніюш, якое адслужыў настаяцель царквы а. Аляксандр. Пасля ўсе накіраваліся да магілы Ларысы і Янкі Геніюшаў. Там служылася паніхіда па нябожчыках. Да помніка быў ускладзены вянок зроблены ў бел-чырвона-белых колерах з жоўтым ярылаўскім крыжом пасярэдзіне. На могілках выступілі старшыня зэльвенскай суполкі КХП Юрась Качук, адзін з кіраўнікоў КХП Алесь Чахольскі, паэтка Данута Бічэль-Загнетава, стрыечная сястра Ларысы Геніюш Соф’я, госць з Аўстраліі Міхась Лаўдэр, намаганнямі якога ў гэтай далёкай краіне была выдадзена кніжка Ларысы Геніюш. Тут жа, на могіках было вырашана закласці пачатак дзейнасці зэльвенскай краязнаўчай арганізацыі імя Ларысы Геніюш. Затым удзельнікі святкавання накіраваліся на бераг Зэльвенскага вадасховішча, дзе адбыўся канцэрт. У ім прынялі ўдзел бард Андрэй Мельнікаў, выканаўцы фальклорных песень Наталля Матыліцкая і Мікола Трус. Выступілі Данута Бічэль-Загнетава, Міхась Скобла, Анатоль Сідарэвіч і бізнесмен Валянцін Дубатоўка. Дзякуючы апошняму ў мінулым годзе ў зэльвенскай царкве была ўсталявана мемарыяльная дошка ў гонар Ларысы Геніюш.