Мельнік гуляў

Мікола ВАЎРАНЮК

Магда мела на ўвазе як самую мясцовасць, так і мерапрыемства, на якім мы гутарылі, а менавіта „Музычныя дыялогі над Бугам”. Адзінаццаты выпуск імпрэзы прайшоў 11 і 12 жніўня, як заўсёды, у амфітэатры Тапаліна на самым беразе Буга. „Дыялогі”, якія два гады лічацца Агульнапольскай прэзентацыяй культуры нацыянальных меншасцей, наладзілі Беларускае грамадска-культурнае таварыства, Управа гміны Мельнік і Таварыства сяброў Мельніцкай зямлі.

Падчас двухдзённых канцэртаў запрэзентаваліся дваццаць калектываў. На сцэне пад адкрытым небам гучалі песні беларускія, літоўскія, польскія, нямецкія, славацкія, чэшскія, яўрэйскія. Беларусаў прадстаўлялі беластоцкія „Каласкі”, „Прымакі” і „Ас”, мінская „Бяседа” ды мазырскае „Стрэчанне”. Беларуска-ўкраінскае моўнае памежжа паказалі фолькавая „Чарамшына” і варшаўскі калектыў „Goscie z Nizin”, які захапляецца аўтэнтычным, не скажоным фальклорам. „Goscie z Nizin” перамаглі сёлета на Фестывалі беларускай песні, спяваючы песню „Ой, там ясно”, запісаную ад Веры Дзік з Вітава. У Мельнік калектыў прыехаў са свежа запісанай на Беластоцкім радыё кружэлкай.

— Тыя тысячы ў гэтым прыгожым месцы доказ таму, што імпрэза патрэбная, — кажа Яўген Віхоўскі, войт Мельніцкай гміны. — Разумеюць гэта нашы пастаянныя спонсары, якія, нягледзячы на цяжкую сітуацыю ў гаспадарцы, едучы часта на дэфіцыце, выцягнулі грошы з прыватнай кішэні, абы толькі „Дыялогі” адбыліся. Я і цэлая Гмінная ўправа будзем рабіць усё, каб гэтае мерапрыемства развівалася. Можа ў будучыні выйдзем на іншыя культуры, не толькі на бліжэйшых суседзяў. Адзін з нашых гасцей, амбасадар Анголы ў Варшаве, абяцаў, што праз год прывязе да нас калектыў са сваёй краіны.

„Музычныя дыялогі над Бугам” — эгалітарнае мерапрыемства. Гуляюць на ім людзі рознага грамадскага статуса і ўзросту.

— Цяпер гуляюць нашы бацькі, — гавораць дзве маладыя дзяўчыны дзесьці каля сёмай вечара, — але яны зараз паедуць і тады мы будзем гуляць. Да раніцы.