Рыхтуецца даведнік аб беларускіх дзеячах у Польшчы

Віталь ЛУБА

Першай тэмай, якая ставілася на разгляд, былі вынікі ІІІ З’езда беларусаў свету. Крытычную ацэнку з’езду даў старшыня Літаб’яднання „Белавежа” прафесар Ян Чыквін. Паводле яго, з’езду не хапіла канкрэтнасці, а Вялікая рада аказалася дэкаратыўнай структурай, якая на практыцы не дзейнічае (не склікаюцца пасяджэнні і не прымаюцца пастановы). „Нам трэба рабіць прагматычную пазітывісцкую працу і не вязацца толькі з «Бацькаўшчынай»”, — сказаў Ян Чыквін. Пятро Юшчук, які ўдзельнічаў у сустрэчы ў Савеце Міністраў, паведаміў, што ІІІ З’езд атакаваўся афіцыйнымі чыннікамі як нерэпрэзентатыўны форум (дзяржаўныя ўлады намерваюцца восенню склікаць Форум беларусаў свету, пасля прэзідэнцкіх выбараў). Беларускі саюз у РП вырашыў утрымліваць шчыльныя кантакты са Згуртаваннем беларусаў свету „Бацькаўшчына” і не ўдзельнічаць у палітызаваных акцыях урада Рэспублікі Беларусь.

Чарговай справай, якая абмяркоўвалася на сходзе, быў удзел Беларускага саюза ў выбарчай кампаніі 2001 года. На сёлетніх парламенцкіх выбарах Беларускі саюз вырашыў не ствараць свайго выбарчага камітэта, а толькі падтрымаць асобу Андрэя Карчэўскага — старшыні Беларускага аб’яднання студэнтаў, які балаціруецца са спіска Уніі вольнасці. Вырашана таксама афіцыйна раскінуць выбарчае пагадненне БС з Уніяй працы, паколькі апошняя не стрымала абяцання змясціць на спісках кааліцыі СЛД-УП беларускага кандыдыта, які карыстаўся б падтрымкай Беларускага саюза.

Управа Беларускага саюза вырашыла яшчэ ў гэтым годзе выдаць трохмоўны (на беларускай, польскай і англійскай мовах) даведнік аб беларускіх арганізацыях, згуртаваных у БС. Выкананне гэтай выдавецкай ініцыятывы даручана старшыні БС Яўгену Вапу. Вырашана таксама пачаць работу па падрыхтоўцы біяграфічнага даведніка аб беларускіх дзеячах у Польшчы. Праца над даведнікам разлічана на некалькі гадоў. У выданне праўдападобна будуць занесены прозвішчы тых дзеячаў, якія жылі і працавалі на тэрыторыі цяперашняй Польшчы пасля 1945 года. Каардынатарам прац па падрыхтоўцы біяграфічнага даведніка стаў прафесар Ян Чыквін.