Ніва № 28 (2357), 15 ліпеня 2001 г.

ІІІ З’езд беларусаў свету

Віталь ЛУБА

5 і 6 ліпеня г.г. у Мінску адбыўся ІІІ З’езд беларусаў свету. Удзельнічалі ў ім дэлегаты ад беларускіх суполак з Беларусі і замежжа. З Польшчы ў працах з’езда прынялі ўдзел дваццаць два дэлегаты. Беларускае грамадска-культурнае таварыства, якое ў двух папярэдніх з’ездах удзельнічала, на сёлетні форум беларусаў свету сваіх прадстаўнікоў не паслала.

ІІІ З’езд, падрыхтаваны Міжнародным грамадскім аб’яднаннем „Згуртаванне беларусаў свету «Бацькаўшчына»”, скліканы быў з мэтай кансалідацыі беларускай нацыі, узмацнення грамадзянскай супольнасці і акрэслення перспектываў развіцця Беларусі ва ўмовах цывілізацыйных зменаў. У першы дзень дэлегаты з’езда заслухалі і абмеркавалі справаздачна-аналітычныя даклады, а на другі — працавалі ў трох секцыях і выбралі кіруючыя органы МГА ЗБС „Бацькаўшчына”. У галоўны кіруючы орган — Вялікую раду — увайшло 128 чалавек. Беларускія суполкі з Польшчы прадстаўляць у ёй на працягу бліжэйшых чатырох гадоў будуць Алесь Баршчэўскі, Яўген Вапа, Галена Глагоўская, Алег Латышонак, Віталь Луба, Яўген Мірановіч, Ян Чыквін і Пятро Юшчук. Прэзідэнтам МГА ЗБС „Бацькаўшчына” быў выбраны прафесар Анатоль Грыцкевіч, а старшынёй Рады — Алена Макоўская. З’езд прыняў праграму „Замежная беларуская супольнасць у ХХІ стагоддзі”, у якой запісаны асноўныя дзеянні па кансалідацыі і дапамозе беларускай дыяспары на перыяд да 2005 года.

Больш дэталёва пра ІІІ З’езд беларусаў свету напішам у наступным нумары.