Мітрапаліт Сава — ганаровы доктар Беластоцкага універсітэта

— Дзяржаўны дзеяч вядомы ў Еўропе і свеце, вялікі чалавек, які выйшаў са сціплых жыццёвых умоў, і які дайшоў да пашаны і годнасці, — гаварыў аб мітрапаліце ў ляўдацыі рэктар універсітэта праф. Адам Ямруз. Прыпомніў ён, што калі пару гадоў таму вырашаліся лёсы універсітэта, мітрапаліт падтрымоўваў гэтыя намаганні.

У выказваннях падкрэсліваліся заслугі мітрапаліта Савы ў экуменічнай і навуковай сферы. Ён — прафесар багаслоўскіх навук, аўтар каля ста навуковых публікацый, прысвечаных шматграннай тэалагічнай і грамадскай тэматыцы, між іншым, прароцтвам Старога запавету, ролі Багародзіцы ў святле Свяшчэннага пісання і актуальнага становішча Царквы ў Польшчы.

— Такімі будуць касцёлы ў Польшчы, якім іх духоўных абучэнне, — сказаў прафесар Варшаўскага універсітэта Міхал Петшак, спасылаючыся на выкладчыцкую дзейнасць мітрапаліта Савы ў Хрысціянскай тэалагчнай акадэміі.

— Калі з маёй працы нешта вынікла, прымаю гэта з пакорай і годнасцю, — сказаў мітрапаліт Варшавы і ўсяе Польшчы Сава. Дзякуючы за ўзнагароду, звярнуў ён увагу на сучасную ролю Беластоцкага універсітэта як вышэйшай навучальнай установы, распаложанай пры ўсходняй граніцы, а таксама на значэнне праваслаўнай культуры і навукі ў некалькіх апошніх стагоддзях.

Мітрапаліт адзначыў, спасылаючыся на словы іншага ганаровага доктара Беластоцкага універсітэта, Ежы Гедройца, што вучэльня мусіць быць адкрытай на асаблівасці і культурнае багацце рэгіёна. Павінна таксама даследаваць шматкультурнае і многаканфесійнае пагранічча. Падкрэсліў таксама значэнне адкрыцця ва універсітэце супольнага тэалагічнага факультэта: каталіцкага і праваслаўнага (ВНУ мае такія планы). Ужо два гады працуюць у Беластоку асобныя кафедры абедзвюх канфесій.

Ва ўрачыстасці ўдзельнічалі высокія госці, між іншым, біскупы Каталіцкага касцёла, іерархі Сабора ПАПЦ, Польскай экуменічнай рады і паслы праваслаўных краін, між іншым, Грэцыі, Югаславіі, Беларусі, Украіны, Балгарыі, Румыніі і Арменіі.