Камуністычны саюз

Зміцер КІСЕЛЬ

Гродзенскія ўлады ўклалі велізарныя грошы ў падрыхтоўку сустрэчы інтэгратараў. Працаўнікам бюджэтнай сферы нават затрымалі выплату заробкаў. Адно добра, што гэта пайшло на карысць гораду. Адрамантавалі шмат дамоў у цэнтры, заасфальтавалі дарогі. Але некаторыя гродзенцы не былі ўдзячны за такі клопат і падрыхтавалі прыбыўшым гасцям такую сустрэчу, за якую мясцовым уладам можа дастацца на арэхі ад мінскіх начальнікаў.

Гасцей схода з украінскага і малдаўскага парламентаў, якія прыехалі цягніком, некалькі дзесяткаў чалавек павіталі воклічамі „Ганьба!” і „Незалежнасць!”. Надзіва міліцыяй быў затрыманы толькі адзін чалавек — былы старшыня Саюза палякаў Беларусі Тадэвуш Гавін, які паказаў дулю ў камеру міліцэйскаму аператару. За тое на наступны дзень атрымаў ён трое сутак арышту.

Вечарам лідэрка ўкраінскіх „новых сацыялістаў” на сустрэчы ў студыі гродзенскага тэлебачання скардзілася, што ёй давялося ісці пад воклічы „Ганьба!”. Яна з упэўненасцю сцвердзіла, што так яе вітала „замбіраваная, купленая за амерыканскія долары моладзь”, быццам сама прысутнічала, калі тыя долары давалі.

Расійскім дэпутатам пашэнціла больш. Яны прыляцелі на самалёце і ў аэрапорце іх сустракала афіцыйная дэлегацыя ад улад — хлебам і соллю. Аднак у першы дзень свайго побыту дэпутаты парламенцкага схода вырашылі пагуляць у дэмакратыю і, перад сваім першым пасяджэннем у аблвыканкаме, некаторыя выйшлі на плошчу Леніна пагутарыць з народам. Але зразумеўшы, што ў Гродне іх асабліва не чакалі, хутка адступіліся. Калі закончылася пасяджэнне і „госці” выйшлі з памяшкання аблвыканкама, іх зноў сустрэлі гучныя „Ганьба!” і „Незалежнасць!”. Пасля, на сустрэчы ў медычным універсітэце, спікер расійскага парламента Генадзь Селязнёў скажа, што крычала кучка моладзі, а народам былога СССР незалежнасць ужо надакучыла. На наступны дзень гродзенскія ўлады былі больш прадбачлівымі. Плошча каля аблвыканкама была ачэплена міліцыяй. Да ўдзельнікаў сесіі нікога не дапускалі. Калі група народафронтаўцаў спрабавала прайсці, яе спынілі. Дзевяць чалавек былі затрыманы. Яны правялі ў пастарунку больш трох гадзін.

Што да афіцыйнай часткі падзей. 4 чэрвеня госці і ўдзельнікі парламенцкага схода знаёміліся з прамысловасцю і сельскай гаспадаркай Гродзеншчыны. Між іншым, наведалі памежны пераход Брузгі, які ніяк не могуць дабудаваць згодна запланаванаму праекту. Справа ў тым, што фінансаванне павінна адбывацца з саюзнага бюджэту (беларуска-польская мяжа пасля падпісання саюзнай дамовы павінна была стаць і расійска-польскай). Аднак выдаткавана толькі невялікая частка грошай. Яна ўжо выкарыстана.

У той жа дзень, па ініцыятыве ўкраінскіх парламентарыяў, была ўтворана міжпарламенцкая суполка ЗУБР, што расшыфроўваецца як „За Саюз Украіны, Беларусі і Расіі”. Пра гэты ЗУБР адразу сталі гаварыць беларускія СМІ. Шмат гаварылася пра яго і на самой сесіі на наступны дзень, бо для камуністычных рэваншыстаў (а гэта ў большасці яны складаюць парламенцкі сход, калі не лічыць расійскіх імперыялістаў) без Украіны новая імперыя, якую яны плануюць утварыць, непаўнавартасная.

Галоўнай падзеяй сесіі быў выступ Аляксандра Лукашэнкі. Распачаў ён на аптымістычнай ноце. Маўляў, хутка будзе прыняты Канстытуцыйны акт аб стварэнні адзінай дзяржавы, пройдуць выбары ў адзіны парламент. Ён нават прапанаваў спікеру расійскага парламента Генадзю Селязнёву і падследнаму па справе аб карупцыі Паўлу Барадзіну заняць высокія пасады ў новай дзяржаве. Лукашэнка чарговы раз пераконваў, што Беларусі не варта эканамічна звязвацца з Еўропай, а схіляцца да Расіі. З ягоных слоў выходзіла, што гэта не Захад не хоча інвеставаць у беларускую эканоміку, толькі ён — Лукашэнка — прынцыпова адмаўляецца ад грабежніцкіх інвестыцый.

Бяда толькі ў тым, што Расія прытрымліваецца ў першую чаргу сваіх эканамічных інтарэсаў, а на дакучлівага саюзніка звяртае мала ўвагі, толькі выкарыстоўвае. Так, па словах самога Лукашэнкі, Расія нічога не плаціць за свае ваенныя базы ў Беларусі, „Газпрам” без падаткаў будуе газаправод, за транзіт нафты і газу плаціць у чатыры разы менш чым Украіне і ў пяць разоў менш чым еўрапейскім краінам. У сваю чаргу ўводзіць мытню на мяжы з Беларуссю, бярэ больш за энергарэсурсы чым са сваіх спажыўцоў, нягледзячы на дамоўленасць паніжае пошліны на ўвоз замежных тэлевізараў да 20%, што можа прывесці да неканкурэнтаздольнасці беларускіх тэлевізараў. А самае галоўнае — не спяшаецца аб’ядноўвацца. Расійскі ўрад займаецца іншымі справамі. Аднак Лукашэнка запэўніў, што ўсё роўна з’яўляецца адданым саюзнікам Расіі.

Ён быццам не разумее — перад ім у зале сядзелі людзі мінулага стагоддзя, якія мараць пра аднаўленне таго, што было. А ў Расіі зараз пры ўладзе „новыя рускія”, якім Беларусь безумоўна патрэбна, але як стратэгічны плацдарм у палітычным сэнсе і калонія, якую можна абабраць у эканамічным.

Закончылася сесія ўсеагульным абмеркаваннем і ўхваленнем прамовы Лукашэнкі. Самі дэпутаты нічога канкрэтнага не вырышалі. Адчуванне такое, што яны прыехалі ў Гродна, каб паслухаць беларускага прэзідэнта.