Хацеў паспрыяць Беларусі!

Ганна КАНДРАЦЮК

— У Мінску я пабываў як госць, я не мог крытыкаваць улад, — апраўдваўся ў час прэс-канферэнцыі 21 мая г.г. старшыня ГП БГКТ. — Я паехаў у Мінск не таму, што сімпатызую з урадам Лукашэнкі, а таму што я — беларус. У мяне дзве айчыны — Польшча — якой я грамадзянін, і Беларусь — айчына этнічная. І адной, і другой краіне я хачу служыць як найлепш. Сваім выступленнем хацеў я паспрыяць Беларусі.

Пасол Сейма Ян Сычэўскі дадаў, што сам не мае поўнага ўяўлення сітуацыі ў Беларусі. Аднак з яго назіранняў і вопыту выглядае яна не так дрэнна. Лепш як у Польшчы, на той прыклад, развіваецца там жыллёвае будаўніцтва, меншае беспрацоўе, у краіне грамадзяне адчуваюць сябе бяспечна, маюць мінімальнае сацыяльнае забеспячэнне.

— Я гаварыў пра вядомыя ў Еўропе факты, — адзначыў Сычэўскі, — што ў Польшчы распрадаецца заходняму капіталу дзяржаўную маёмасць за 10 працэнтаў вартасці, што ў нас усё больш беспрацоўных, наша вёска стаіць на каленях. Я не крытыкаваў Польшчу, гаварыў абсалютна праўдзівыя факты, каб перасцерагчы Беларусь перад такімі з’явамі.

Сычэўскі, традыцыйна, усю віну скінуў на мас-медыя, якія ўчынілі над ім „sad czarownic” і пачалі заходзіцца ў сваіх прэсавых мудрасцях. На заўвагу журналістаў, што і беларускае тэлебачанне паказала і пракаментавала ягонае выступленне, Сычэўскі не меў адказу. На пытанне — якую частку беларускай меншасці сабой прадстаўляе, старшыня ГП БГКТ сказаў:

— Нават калі ад мяне ўсе адхіляцца, я не запярэчу сваім выказванням.

Дадаў, што атрымаў сотні тэлефонаў з віншаваннямі і падтрымкай.

— Тэлефанавалі мне не толькі беларусы, — гаварыў Сычэўскі, — мне званілі і дзякавалі таксама палякі-католікі.