Справа Андрэя Жукаўца

Аляксандр ВЯРБІЦКІ

Судовы разбор быў папярэджаны гадзінным пікетам з удзелам заступнікаў Андрэя Жукаўца з Саюза беларускіх палітычных уцекачоў у Польшчы, які адбыўся перад будынкам Акруговага суда. Пікетчыкі выступалі супраць выдачы Жукаўца ў Беларусь і за яго вызваленне з арышту. Мэтай судовага разгляду не было вырашэнне пра яго выдачу органам юстыцыі Рэспублікі Беларусь, толькі выпрацоўка меркавання пра заканамернасць такой выдачы; рашэнне пра выдачу прымае міністр юстыцыі Рэчы Паспалітай. Міністр Лех Качынскі ў той самы дзень прыняў дэлегацыю ад Саюза беларускіх палітычных уцекачоў у Польшчы, якая хадайнічала за тое, што і ўдзельнікі беластоцкага пікета.

Суд не займаўся заканамернасцю вышуку, бо пра гэта вырашыў той юрыдычны орган, які прыняў заяўку з Беларусі. Суд разглядаў абставіны, у якіх апынуўся падсудны. Былі заслуханы інфармацыі ад самога Андрэя Жукаўца і траіх сведкаў — ягоных заступнікаў. У сваіх выступленнях яны клалі націск на нелегітымнасць назначэння юрыдычных асоб, якія выслалі вышуковы ліст і на неаб’ектыўнасць беларускіх юрыдычных органаў, якія, у сваю чаргу, падпарадкаваны адміністрацыі. Апальныя валютныя крэдыты былі выдзелены фірме, якой саўладальнікам быў Андрэй Жукавец, а самыя грошы банк пералічваў на рахункі тых замежных фірмаў, у якіх фірма Андрэя Жукаўца купляла матэрыялы для сваёй прадукцыі. Падсудны тых грошай не браў, плаціў адсоткі ад іх велічынёй каля пятнаццаці тысяч долараў у месяц, а аддачу самога крэдыту тройчы, у пагадненні з банкам, адтэрміноўваў. Падсудны і сведкі намагаліся даказаць, што расквітацца з банкам Андрэю Жукаўцу перашкодзіў сам банк па загадзе прэзідэнцкай адміністрацыі, якая гэтакім чынам пакарала даўжніка за ягоную падтрымку апазіцыі. Заступнікі Андрэя Жукаўца, у іх ліку і беластоцкія адвакаты з сенатарам Янам Хайноўскім, згадвалі пра магчымыя здзекі і пагрозу жыццю падсуднага ў Беларусі, а таксама прыводзілі прэцэдэнты, м.інш. Тамары Віннікавай, якая санкцыяніравала крэдыты Андрэю Жукаўцу, а цяпер прабывае ў Вялікабрытаніі, дзе юрыдычныя органы адмовілі яе выдачы ў Беларусь. У якасці дакументаў у падтрымку меркаванняў пра небяспеку падсуднаму прыводзіліся заявы Маладога фронту і Сяргея Шарэцкага з беларускага боку ды Незалежнага звязу студэнтаў і пасла Юзэфа Мазалеўскага з польскага.

Акруговы суд у Беластоку прызнаў юрыдычна дапушчальнай выдачу Андрэя Жукаўца ў Беларусь. Міністр юстыцыі Рэчы Паспалітай Лех Качынскі абяцаў прадстаўнікам Звязу беларускіх палітычных уцекачоў у Польшчы, што не падпіша рашэнняў аб выдачы ў Беларусь ні на Андрэя Жукаўца, ні на іншых беларускіх апазіцыянераў.