Пошукі новых форм

Аляксей МАРОЗ

Ліцэістаў і настаўнікаў прывітаў старшыня БГКТ Ян Сычэўскі. Вядучыя Аліцыя Леанюк і Цэзары Скепка запрасілі выступіць першымі тэатральную групу з Бельскага белліцэя. Ліцэісты, якіх падрыхтавала настаўніца Анна Бжазоўская, паказалі беларускі абрад вячорак. Вучні танцавалі лявоніху, польку, спявалі беларускія народныя песні ды паказалі пастаноўку казкі Кандрата Крапівы „Дзед і баба”. За прадстаўленне „Вячоркі ў Паўлінкі” атрымалі яны першае месца і галоўную ўзнагароду. Другое месца заняў калектыў Гайнаўскага белліцэя, які выступіў з пастаноўкай п’есы Міхася Чарота „На Купалле”.

— Падабралі мы гэту п’есу, бо ў ёй адлюстраваны беларускія абрады і песні. Такім чынам вучні ўзбагачаюць свае веды пра беларускую культуру і традыцыю, — заявіў настаўнік Ян Карчэўскі, які рыхтаваў вучняў на занятках тэатральнага гуртка.

Узнагароду за пошукі новых сцэнічных і рэпертуарных форм атрымала кабарэ „Куль” з Бельскага белліцэя (з Алегам Кабзаром), якое падрыхтавала пародыю на бразільскую тэленавелу.

— Мы ўжо па традыцыі не паказваем сур’ёзных пастановак, толькі стараемся развесяліць гледачоў, хаця не ўсім падабаюцца пародыі на беларускія песні, — сказала ўдзельніца кабарэ Жанэта Роля. — У час рэпетыцый не вылучаем ні кіраўніка, ні рэжысёра, кожны адчувае сябе адказным за падрыхтоўку пастаноўкі.

— Найчасцей спектакль узнікае спантанна, без сцэнарыя, з многімі інтэрпрэтацыямі, — дадала Мажэна Жменька.

Камісія, якую састаўлялі Яніна Плютовіч (інструктар БДК, старшыня), Вольга Андраюк (інструктар ГДК) і паэт Юрка Баена, прысвоіла па дзве ўзнагароды за добрую акцёрскую ігру — Раману Васілеўскаму з Бельскага белліцэя і Малгажаце Карпюк з Гайнаўскага белліцэя, а за падрыхтоўку тэатральных калектываў — настаўнікам Анне Бжазоўскай і Яну Карчэўскаму.

Дэкламатары ў якасці рэпертуару выкарысталі сучасную паэзію і фрагменты прозы „белавежцаў”. Камісія станоўча ацаніла іх выступленні.

— Вельмі ўдала выступалі белліцэісты. Відаць працу вучняў і настаўнікаў. Тэксты былі падабраны трапна, можна заўважыць сучасны гумар, экспрэсію і настальгію, — заявіў член камісіі Юрка Баена.

Самую значную ўзнагароду, Гран-пры, атрымала Наталля Лемеш з Гайнаўскага белліцэя.

І месца: Эмілія Шымчук (Бельск), Дам’ян Парфянюк (Бельск), Агнешка Галімская (Гайнаўка).

ІІ месца: Юстына Койла (Гайнаўка), Моніка Чыжэўская (Бельск), Галена Сідэвіч (Бельск).

ІІІ месца: Юліта Муха (Бельск), Малгажата Янчук (Гайнаўка), Анна Садоўская (Гайнаўка).

Вылучэнні: Дамініка Матысюк (Гайнаўка), Мажэна Жменька (Бельск), Юстына Юрчук (Бельск), Аліна Асташэвіч (Бельск), Эміль Матысюк (Бельск).