Ніва № 12 (2341), 25 сакавіка 2001 г.

Барыс Кіт на Беласточчыне

Ганна КАНДРАЦЮК

Барыс Кіт, жывая легенда Беларусі (год нараджэння 1910, зараз жыхар Франкфурта-на-Майне), акадэмік Міжнароднай акадэміі астранаўтыкі, вынаходнік вадароднага паліва для касмічных караблёў, заснавальнік беларускай калоніі ў Саўт-Рыверы, беларускі асветнік, гасцяваў ад 7 да 11 сакавіка г.г. у Беластоку.

— Мэта майго падарожжа прыватная, — кажа прафесар Кіт. — Я прыехаў сустрэцца са сваім добрым калегам з Гродна, прафесарам Андрэем Майсяёнкам.

У Беластоку пазнаёміўся таксама з сям’ёй Аркадзя Лашэвіча, I cакратара Ваяводскага камітэта ПАРП у Беластоку ў 1957-1972 гадах.

Знаёмства з сынам Лашэвіча, Віктарам, было нагодай для добрых успамінаў. Прытым адкрылася замоўчаная старонка ў беларускай гісторыі.

— Аркадзь Лашэвіч многа зрабіў для беларусаў як старшыня вучнёўскага камітэта Віленскай беларускай гімназіі. Менавіта, дзякуючы яго падтрымцы Барыс Кіт, раней настаўнік матэматыкі, стаў дырэктарам Беларускай гімназіі. Пасля, калі Вільня апынулася ў межах Літоўскай ССР, Лашэвіч дапамагаў пераводзіць беларускую гімназію ў Навагрудак. Актыўна ўдзельнічаў у жыцці школы, выступаў на сходах з прамовамі, заўсёды па-беларуску.

— Ён быў маёй правай рукой, вялікім беларускім патрыётам, — успамінае найлепшымі словамі былога вучня прафесар Кіт.

Дух даўняга сяброўства паспрыяў новаму знаёмству паміж Барысам Кітам і сынам былога вучня, дацэнтам Віктарам Лашэвічам і яго сям’ёй. У іх кампаніі Барыс Кіт пабываў у Супраслі, Тыкаціне, Гайнаўцы, Белавежы. Госць наведаў таксама беластоцкую Медыцынскую акадэмію, Кафедру беларускай культуры беластоцкага Універсітэта і радыё „Рацыя”, сустрэўся з журналістамі „Нівы”, „Czasopisa” і Радыё Беласток.