Памяркоўнае задавальненне

Аляксандр ВЯРБІЦКІ

Ліст быў адрасаваны прэзідэнту Рэчы Паспалітай, старшыні Рады Міністраў ды маршалкам Сейма і Сената. Адказ прэзідэнта яшчэ невядомы. Спадар Зенюк мяркуе, што прэзідэнт чакае на іншых, каб фінальна аднесціся да цэласці спраў. З Сейма прыйшло паведамленне, што ліст накіравалі ў Камісію нацыянальных і этнічных меншасцей. Спадарыня маршалак Сената ў справе ліста звярнулася да старшыні Рады Міністраў, а ён ёй адпісаў, што пераслаў ліст міністру ўнутраных спраў. І вось у палове студзеня аўтары ліста атрымалі адказ на яго, а пад канец лютага абнародавалі сваё стаўленне да таго адказу.

Адказ прыносіць пэўнае задавальненне, але не поўнае. Аўтары ліста спадзяваліся, што ўлады непасрэдна зоймуцца некаторымі справамі, аднак яны апусцілі іх на ніжэйшы ўзровень або далі ўхілістыя адказы. Напрыклад, адказ міністра інфармуе пра колькасць праваслаўных у некаторых паліцэйскіх установах Падляшскага ваяводства, але ж у Ваяводскай ці Маршалкаўскай управах прадстаўнікоў меншасцей няма. Стратэгія развіцця ваяводства прадбачвае найменшыя капіталаўкладанні ў яго паўднёва-ўсходняй частцы, дзе пражываюць меншасці. Таксама пра сродкі на захаванне культурнай спадчыны гаворыцца, але канкрэтных грошай — няма.

Закранутыя ў лісце справы будуць разглядацца Міжведамасным калектывам па справах нацыянальных меншасцей. Адно з яго пасяджэнняў прадбачваецца правесці ў Беластоку ў красавіку-маі г.г. Ян Зенюк выказаў спадзяванне, што міжведамаснае зацікаўленне нашымі справамі паспрыяе рашэнню хвалюючых нас спраў. А і сам прэм’ер-міністр Рэчы Паспалітай Ежы Бузэк 20 ліпеня мінулага года заявіў, што меншасці павінны мець большыя прывілеі, чым большасць.