Усё дагары нагамі

Хельмут КАМЕНСКІ

Найбольш цікавым стаўся эпілог канферэнцыі, а менавіта вяртанне ўдзельнікаў у Беларусь. На мяжы іх чакалі як надзвычай небяспечных злачынцаў. Старшыні гродзенскіх філіялаў Грамады і АГП Віктар Сазонаў і Аляксандр Пагуляеў ледзь пераехалі за польскі шлагбаўм, былі ўзяты пад пільны кантроль. Памежнік надоўга забраў пашпарты, а мытнік запатрабаваў запоўніць дэкларацыі. Быў праведзены асабісты агляд палітыкаў і іх рэчаў. Пасля памежнік перадаў пашпарты рэцыдывістаў мытнікам (!?). Быў праведзены яшчэ адзін ператрус рэчаў. Чаго шукалі — невядома? Напэўна, мільёны долараў, пра якія так любіць апавядаць галоўны рэзанатар краіны Зімоўскі. Урэшце, Сазонава і Пагуляева ўсё ж прапусцілі ў зямлю абяцаную. Дзеля аб’ектыўнасці варта дадаць, што памежнікі і мытнікі паводзілі сябе досыць карэктна. Відавочна, што гэтыя людзі проста рупліва выконвалі загад больш уплывовых структур.

Віктар Сазонаў, лідэр гродзенскіх грамадоўцаў, так пракаментаваў сітуацыю:

— У сённяшняй беларускай дзяржаве ўсё перакулена дагары нагамі. Службы бяспекі, якія паводле свайго прызначэння павінны выконваць функцыі захавання і абароны дзяржаўных інтарэсаў, займаюцца адваротным. У той час, калі рознага кшталту інтэграцыйнымі дамовамі сённяшнія ўлады імкнуцца ліквідаваць Беларусь як дзяржаву, яны адсочваюць і пільнуюць тых людзей, якія змагаюцца за незалежнасць і суверэнітэт нашай краіны. Службовым асобам са структур дзяржаўнай бяспекі варта задумацца пра сутнасць сваіх абавязкаў і адказнасць перад законам.

Старшыня гродзенскай арганізацыі АГП Аляксандр Пагуляеў таксама лічыць, што так пільны памежны дагляд быў спланаваны загадзя. Шукалі, напэўна, нейкія сакрэтныя паперы, але, безумоўна, нічога не знайшлі. Выдае на тое, што адсочванне і пераслед грамадска-палітычных лідэраў у Беларусі ўзмацняюцца.