Лепшыя расказчыкі

Аляксей МАРОЗ

— Калі ў Гайнаўцы зноў пачаў дзейнічаць аддзел БГКТ, падумалі мы разгарнуць у горадзе беларускасць. Тады паўстала ідэя конкурсу расказчыкаў для вучняў гайнаўскіх школ. Калі атрымалі дадатковыя сродкі са Стараства, вырашылі пашырыць конкурс на ўвесь Гайнаўскі павет, — успамінае Ян Карчэўскі, сакратар Гайнаўскага аддзела БГКТ, пра мінулагоднія спаборніцтвы. — У гэтым годзе расказвае амаль два разы больш удзельнікаў. З’явіліся вучні з Дубін, Кляшчэляў і Падставовай школы н-р 6 у Гайнаўцы, што вельмі радуе.

Мерапрыемства ўдастоілі прадстаўнікі арганізатараў — Міхал Голуб, старшыня Гайнаўскага аддзела БГКТ, Яўген Янчук, кіраўнік Клуба беларускіх спраў, што дзейнічае пры белліцэі і Яўген Сачко ды Аляксандр Лаўрыновіч, дырэктары школы, якая гасцявала расказчыкаў. Мерапрыемства адкрыў настаўнік беларускай мовы белліцэя Ян Карчэўскі. Праграмны дырэктар Цэнтра грамадзянскай адукацыі Польшча-Беларусь Яўген Вапа, які аказаў конкурсу фінансавую падтрымку, прыбыў павіншаваць пераможцаў.

Першымі выступілі вучні падставовых школ. Свае расказы абапіралі яны на мастацкіх творах. Пасля расказвалі гімназісты. У іх было больш уласных інтэрпрэтацый ды выказванняў на гаворцы.

— Я хацела б, каб удзельнікі конкурсу расказвалі, а не чыталі тэксты на памяць, бо гэта ўжо не расказ, гавэнда. Кожнае слова аўтара расказа можна замяніць сваім словам і тады не трэба турбавацца, што можна нешта забыць. Вучні павінны расказваць тэксты, якія раней прачыталі, або стварыць уласныя расказы, — заявіла старшыня камісіі Наталля Герасімюк, бібліятэкар Беларускага музея ў Гайнаўцы. — Ацэньвалі мы падбор тэкстаў, мастацтва, эмацыйнасць выказвання і вымаўленне. Вельмі добра падрыхтаваліся вучні, якія расказвалі на сваіх гаворках.

Сярод вучняў падставовых школ самую высокую ацэнку атрымала Анна Іванюк з Нарвы, якая выступіла з расказам „Гандляр і чорт”. Вучаніца добра карысталася беларускай літаратурнай мовай ды прыцягнула да сябе ўвагу эмацыйнасцю выказвання. Першае месца ў катэгорыі гімназій атрымала Паўліна Пашко, выступаючы з тэкстам „Гоготуха”, а ў групе белліцэістаў — Бэата Мінько, расказваючы тэкст „Люблю памарыць”. Абедзве дзяўчыны — жывуць у Ласінцы — свае гумарыстычныя расказы прадставілі на гаворцы, узмацняючы гэтым эмацыйнасць выступленняў. Камісія ў іх расказах не магла дашукацца памылак, бо расказчыкі заўсёды маглі заявіць, што ў іх так „говорытся”. Другія месцы занялі Барбара Каліноўская са школы н-р 6 у Гайнаўцы, Іаанна Стоцкая са школы ў Нарве, Анэта Трафімюк са школы ў Чыжах, Іаанна Дунай з Гайнаўскай белгімназіі, Данеля Дудзіч са школы ў Нарве і Анна Садоўская з белліцэя. Трэція месцы занялі Агата Капейчык са школы ў Нарве, Ева Мароз са школы н-р 3 у Гайнаўцы, Івона Крук са школы ў Дубінах, Эвеліна Пліс са школы ў Чыжах, Эвеліна Асіпюк з белгімназіі і Малгажата Карпюк з белліцэя.

Пасля конкурсных выступленняў арганізатары запрасілі расказчыкаў, іх апекуноў ды настаўнікаў на абед. А пасля перад вучнямі выступіў бард і акцёр з Гродна Віктар Шалкевіч.