Ад Свабоды да Перамогі

Зміцер КІСЕЛЬ

Сёлета 14 лютага ў Мінску шэсце моладзі пад лозунгам „Любові, Свабоды, Пераменаў” арганізавала маладзёжная кааліцыя „Пераменаў”, у якую ўваходзяць прадстаўнікі дэмакратычных арганізацый. У 17 гадзін каля трох тысяч маладых людзей сабраліся на плошчы Свабоды. Угару паляцелі тысячы „валянцінак” з віншаваннямі са святам закаханых. Той, хто назбіраў не менш 12 картак, тут жа мог атрымаць аўдыёкасету „More кахання” з беларускай музыкай. Затым, згуртаваўшыся ў калону, моладзь рушыла па цэнтральных вуліцах горада. Шэсце не было санкцыянавана ўладамі. Яго суправаджала вялікая колькасць міліцыянераў і салдат унутраных войск. Але ў час руху калоны сутыкненняў з сілавымі структурамі не было. Моладзь дайшла да плошчы Перамогі, дзе ўдзельнікі шэсця арганізавана разышліся. Тут апамяталася міліцыя, якая, відаць, не чакала такога заканчэння акцыі, і затрымала толькі шэсць чалавек. Двух з іх пры затрыманні міліцыя збіла. Праз нейкі час усе затрыманыя былі звольнены.

Вечарам беларускае тэлебачанне чарговы раз вызначылася хлуслівасцю сваіх рэпартажаў. У навінах было сказана, што ўдзельнікаў шэсця было толькі сто чалавек, хаця кадры на экране сведчылі, што людзей у калоне значна больш. Зноў было шмат слоў пра амерыканскія долары, якія нібыта атрымоўвае моладзь за ўдзел у мерапрыемствах апазіцыі. Ужо звычайным стала параўнанне дзяржаўнымі СМІ беларускай і югаслаўскай апазіцыі. Зараз моладзь параўноўвалі з арганізацыяй „Адпор”, якая адыграла не апошнюю ролю ў звяржэнні дыктатуры Мілошавіча. Зразумела, па словах каментатара БТ, гэта была справа амерыканскіх шпіёнаў. Наогул апошнім часам можна гаварыць пра „югаслаўскі сіндром” у беларускіх улад. Яны яўна баяцца ў Мінску паўтору бялградскіх падзей.

Аднак афіцыйныя СМІ нічога не паведамілі пра міліцэйскую аблогу штаб-кватэры Беларускага народнага фронту, якая працягвалася амаль суткі пасля сканчэння шэсця моладзі. У восем гадзін вечара сядзіба БНФ была ачэплена. Каля яе дзяжурылі пяць машын з супрацоўнікамі сілавых структур. З 23 гадзіны пачаліся перамовы Вінцука Вячоркі і Вячаслава Сіўчыка з падпалкоўнікам міліцыі Сяргеем Гіргелем. Апошні патрабаваў выдаць старшыню Маладога Фронту Паўла Севярынца, якога абвінавачваюць у арганізацыі несанкцыянаванага шэсця. Размовы працягваліся да раніцы. Міліцыя здолела затрымаць ахоўніка сядзібы Міхася Баярына, але неўзабаве яго адпусціла. У 11 гадзін у штаб-кватэры распачалася прэс-канферэнцыя кіраўніцтва кааліцыі „Пераменаў”. У памяшканне ўварваліся міліцыянеры. Аднак прысутнасць вялікай колькасці журналістаў і прадстаўнікоў дыпламатычнага корпуса прымусіла ахоўнікаў рэжыму весці сябе карэктна. Не знайшоўшы Паўла Севярынца, яны пакінулі памяшканне. Але назіранне за штаб-кватэрай перапынена не было.

Акцыя „Пераменаў” адбылася і ў іншых гарадах Беларусі. Аднак была яна там больш спакойнай чым у Мінску. У Гродне прадстаўнікі маладзёжных дэмакратычных арганізацый раздавалі прахожым у цэнтры горада „валянцінкі” з віншаваннямі. А вечарам у Медычным універсітэце адбылася дыскатэка, на якой, акрамя англамоўных шлягераў, гучала беларуская музыка.