Гранты няўрадавым арганізацыям

Аляксей МАРОЗ

— Саюз гмін Белавежскай пушчы атрымаў ад Камісіі дэмакратыі фінансавую дапамогу на абсталяванне свайго памяшкання. На падставе якіх крытэрыяў раздзяляеце малыя гранты?

— Прызначаем каля 30 грантаў у год для няўрадавых арганізацый, найчасцей у якасці датацый на рэалізацыю праграм пабудовы дэмакратычнага грамадства. Можам прыдзяліць арганізацыі да 24 тысяч долараў, але найчасцей выдзяляем іх 5-10 тысяч. У выпадку Саюза гмін Белавежскай пушчы, дзе супрацоўнічаюць з сабой войты і бурмістры, Камісія дэмакратыі прызначыла сродкі не на праграму, а на абсталяванне кабінета, неабходнага для дзейнасці.

— Ці Саюз гмін Белавежскай пушчы можа разлічваць на Вашу дапамогу ў будучыні?

— Пакарыстацца грантам можна толькі раз. Аднак Саюз гмін можа супрацоўнічаць з Пасольствам ЗША надалей. Мы можам дапамагчы інфармацыяй і парадай.

— Вы прысутнічалі на пасяджэнні Саюза гмін, дзе многа гаварылася аб ахове Белавежскай пушчы. Ці Пасольства ЗША зацікаўленае аховай пушчы?

— Мы таксама ўспамагаем арганізацыі, якія хочуць ахоўваць сваё асяроддзе і робім гэта ў розных мясцовасцях Польшчы. Зараз разглядаем праграму з Сопата. Там грамадзяне згуртаваліся для ачысткі свайго асяроддзя. Калі б быў прадстаўлены праект аховы Белавежскай пушчы, мы б яго таксама разгледзелі. Год таму ў Белавежскі нацыянальны парк прыязджаў амерыканскі валанцёр з Корпуса міра, які цікавіўся аховай асяроддзя. У рамках абмену гасцей супрацоўнік Белавежскага парку Малгажата Бушко ездзіла ў ЗША, дзе наведала паркі, сустрэлася з іх дырэктарамі, пабачыла як у Штатах ахоўваюць прыроду, як дырэктары паркаў супрацоўнічаюць з жыхарамі навакольных мясцовасцей.

— На Беласточчыне жыве многа беларусаў. Якую дапамогу можа запрапанаваць Пасольства ЗША беларускай меншасці ў Польшчы?

— Да гэтай пары не было праграм, якія накіроўвалі б нам прадстаўнікі беларускай меншасці. Калі беларускія арганізацыі выступяць да нас са сваімі праектамі, разгледзім іх.

— Ці супрацоўнічаюць з Вамі арганізацыі іншых нацыянальных меншасцей?

— Цяпер знаходзіцца ў нас праект Фонду „Pogranicze” з Сейнаў. Даем ім 5 тысяч долараў на кніжкі і фільмы аб нацыянальных меншасцях у Польшчы, якімі будзе папоўнена іхная бібліятэка. Такім чынам людзі з усёй Еўропы будуць маглі прыехаць у сейненскую бібліятэку і пазнаёміцца з сабранымі ў ёй матэрыяламі. Размаўляем з яўрэямі ў Амерыцы, згуртаванымі ў Саюзе яўрэйскіх гмін, і польскім урадам, каб здзейсніць праект дапамогі яўрэям у Польшчы.

— Дзякую за размову.