Запалохванне ненадзейных

Віталь ЛУБА

Валеры Мазынскі лічыць гэтае здарэнне запалохваннем дзеячаў культуры, якія намагаюцца захаваць творчую незалежнасць і не падпарадкоўвацца рэпертуарным указанням міністэрскіх чыноўнікаў. Створаны ім тэатр „Вольная сцэна” вылучаецца нацыянальным духам, які ўлады стараюцца знішчыць. Прыгадаем, што ў мінулым годзе трупа „Вольнай сцэны” выйшла з-пад апекі Міністэрства культуры пасля таго як ведамства адмовілася фінансаваць п’есу Аляксея Дударава „Прынц Мамабук”, вызваліла Мазынскага з пасады мастацкага кіраўніка і назначыла на яго месца Валерыя Анісенку. Цяпер „Вольная сцэна” працягвае сваю дзейнасць як недзяржаўны тэатр. У гэтым годзе Валеры Мазынскі стаў яшчэ членам аргкамітэта па стварэнні „Згуртавання ўдзельнікаў адраджэнскіх, незалежніцкіх, вызвольных рухаў”, якога ўстаноўчы з’езд мае адбыцца ў сакавіку. Мэта ствараемай творчай інтэлігенцыяй арганізацыі — аб’яднаць усіх, хто апошнімі дзесяцігоддзямі абараняў мову, культуру, гісторыю, нацыянальную годнасць і свабоду беларусаў.

Невядомыя злачынцы, якіх міліцыя да гэтай пары не выявіла, нападалі таксама на іншых прадстаўнікоў нацыянальна арыентаванай ітнэлігенцыі. Ад іх нядаўна пацярпелі пісьменнік Артур Вольскі, кінарэжысёр Юрый Хашчавацкі (аўтар фільма „Звычайны прэзідэнт”) ці артыст Расціслаў Янкоўскі. Валеры Мазынскі ўпэўнены, што злачынцу не выкрыюць, паколькі гэта палітычнае папярэджанне, а не крымінальны выпадак.