У будучыню з новымі падручнікамі

Міра ЛУКША

— Гэта быў для нас выклік, паколькі да гэтага часу мы не выдавалі падручнікаў, — сказаў Яўген Чыквін. — А кожны падручнік павінен быць самы добры і самы прыгожы, каб заахвоціць вучня. А тэрміны былі ж вельмі кароткія. Маю надзею, што, пасля такіх хвалебных ацэнак, даручана будзе нашаму выдавецтву выпускаць і іншыя кнігі для беларускай нацыянальнай меншасці ў Польшчы. Спадзяюся на давер і дапамогу міністэрства адукацыі і сяброў з Беларусі.

Анна Радзюкевіч, галоўны рэдактар падручнікаў, выступіла з дакладам пра важнасць традыцыі ў развіцці грамадства і паасобнага чалавека. Таму і загаловак падручніка для І класа гімназіі — „Са спадчынай у будучыню”. Падручнік гэты мае быць і „караблём”, і „стырном” для маладога беларуса, які, выхаваны ў пашане да традыцыі, будзе адчуваць, якая вялікая культура стаіць за яго плячыма. У кнізе ёсць легенды, паданні, прыказкі, прымаўкі, шмат здымкаў з Беларусі, з Падляшша. „Вяртанне да традыцыі гэта не ёсць працэс застою, рэгрэсу ці акасцянення, — сказала рэдактар. — Канон, традыцыя (напрыклад, ікона, пенні, архітэктура) — гэта падстава, якая дае рост свежаму падыходу сучаснага чалавека, у сучасным кантэксце”.

Добрую ацэнку падручнікам далі рэцэнзенты, м.інш. прафесар Міхал Кандрацюк. Дзякуючы яго заўвагам, у „Хрэстаматыю”, якая здаецца быць рэпрэзентатыўнай для беларускай сучаснай літаратуры (ад Францішка Багушэвіча), былі ўведзены таксама і творы сяброў Беларускага літаратурнага аб’яднання „Белавежа”. Варта было б, заўважыў М. Кандрацюк, стварыць наступныя падручнікі (напрыклад, па гісторыі) для гімназій і выдрукаваць іх якраз у „Orthdruku”, а не ў дзяржаўным выдавецтве WSiP, дзе кнігі выдаюцца марудна, таксама дзеля таго, што вельмі блізкі кантакт стваральнікаў спрыяе ў выданні кнігі.

Лідзія Кулажанка, сааўтарка „Хрэстаматыі”, прывітала ўсіх ад беларускага праваслаўнага Брацтва Віленскіх мучанікаў, якое дзейнічае ад 10 гадоў у Мінску пры Петрапаўлаўскім саборы. Ёсць у іх там невялікі выдавецкі аддзел, які займаецца ў асноўным падрыхтоўкай і выдаваннем царкоўна-гістарычнай і багаслужэбнай ды даведачнай літаратуры. Ідэя „Orthdruku” разам папрацаваць пры супольным праекце аб’яднала творчых людзей і з Беларусі.

— Дзякуючы і чыноўнікам з міністэрства, настаўнікам, выдаўцам, мастакам (Ігар і Ірына Гардзіёнкі) і вельмі кваліфікаваным рэцэнзентам атрымалася, — сцвердзіла Л. Кулажанка, — вельмі прыгожая кніжка, з глыбокай канцэпцыяй закладзенай у аснову. З аднаго боку — яна традыцыйная, з другога — наватарская. Увабрала яна самы лепшы вопыт, накоплены педагогікай і ў Беларусі, і на Беласточчыне, і ўва ўсім свеце. А наватарская — асабліва з пункту гледжання нас, людзей з Беларусі, і па падборы матэрыялу, і па змесце, і па форме падачы, па методыцы, па афармленні. Такіх падручнікаў у нас, у Беларусі, няма яшчэ. Дзякуем аўтарам і выдаўцам, што маем такі ўзор.

Консул РБ Аляксандр Карачун, які ўдастоіў прэзентацыю падручнікаў сваёй прысутнасцю і выдатнай беларускай мовай, спадзяецца на супрацоўніцтва паміж такімі энтузіястамі, што стаяць у абарону інтарэсаў беларускай культуры на польскай зямлі і ўсіх тых, хто дбае пра тыя праблемы ў Беларусі. Усё паказвае на тое, што завяжацца добрае супрацоўніцтва паміж Польшчай і Беларуссю — у Варшаве адбылося сумеснае пасяджэнне прадстаўнікоў міністэрстваў адукацыі Беларусі і Польшчы, на якой прагучалі словы аб дапамозе дзеля выдавання падручнікаў для беларускай меншасці. Ішлі канкрэтныя перамовы адносна планаў і пагадненняў на 2001 год.

Кнігі будуць раздаваны гімназістам бясплатна. Пасля зімовых канікул — у будучыню з падручнікам!