Ніва № 47 (2323), 19 лістапада 2000 г.

Візіт патрыярха Феакціста

Аляксандр ВЯРБІЦКІ

У Польшчы па запрашэнні кіраўніцтва Польскай аўтакефальнай праваслаўнай царквы пабываў патрыярх Румыніі Феакціст. 5 і 6 лістапада пабываў ён на Беласточчыне.

У нядзелю румынскі ўладыка ў суправаджэнні мітрапаліта Савы наведаў беластоцкі сабор св. Мікалая. На ўрачыстым набажэнстве апрача румынскіх і польскіх праваслаўных іерархаў прысутнічалі таксама прадстаўнікі Каталіцкага касцёла, улад, войска, паліцыі і пагранаховы. Патрыярх Феакціст і Беластоцка-Гданьскі епіскап Іакаў сказалі кароткія прамовы, а затым абмяняліся падаркамі. Высокі госць атрымаў ікону, а гаспадар беластоцкага сабора — панагію. На заканчэнне патрыярху Феакцісту адспявалі „Многая лета”.

У панядзелак патрыярх Феакціст у суправаджэнні румынскіх і польскіх праваслаўных іерархаў наведаў два найбольш імпазантныя беластоцкія храмы: спярша царкву Св. Духа, а затым храм Мудрасці Божай (Агія Сафія). Румынскі ўладыка выказаў задавальненне беластоцкаю царквою Агія Сафія, бо яна з’яўляецца адзінай вернай копіяй канстанцінопальскай. Настаяцель царквы Мудрасці Божай а. Анатолій Конах падарыў патрыярху Феакцісту графіку з выявай сваёй царквы і памятны медаль, вычаканены з нагоды асвячэння храма Усяленскім патрыярхам Варфаламеем І. У сваю чаргу ўладыка Феакціст падарыў а. Конаху крыж для богаслужэння ў царкве.

Візіт румынскага патрыярха ў храме Агія Сафія быў, можна сказаць, маланкавы. Вернікі, з нашай усходняй абыякавасцю да пунктуальнасці, ішлі яшчэ ў царкву, калі картэж машын з іерархамі пакінуў яе. Калі ўжо згадка пра вернікаў — было іх намнога менш прысутных, чым падчас візіту Усяленскага патрыярха Варфаламея І.

З храма Мудрасці Божай патрыярх Феакціст падаўся ў Супрасльскую лаўру, а пасля ў манастыры ў Грабарцы і Яблачыне. Зацікаўленне пачэснага госця манастырамі невыпадковае, улічваючы іх ролю ў Румыніі. Менавіта яны, распаложаныя ў цяжка даступных горах, былі адной з галоўных апор румынскага патрыярхату перад наступам рэжыма Чаўшэску на царкву.

У Каталіцкім люблінскім універсітэце патрыярх Феакціст атрымаў званне доктара honoris causa за ягоны ўклад у развіццё міжканфесійнага дыялогу. У Варшаве румынскі ўладыка спаткаўся з польскім прымасам Юзэфам Глемпам, прэзідэнтам і маршалкам Сейма.