Бардаўская восень

Паўліна ШАФРАН

„Бардаўскую восень” вялі Юрка Ляшчынскі і Аляксандр Памідораў. У гэтым годзе было многа заяў — большасць іх паходзіла з Рэспублікі Беларусь. Арганізатары з 23 асоб тыпавалі 15 — з Беластока, Бельска-Падляшскага, Гайнаўкі, Мінска і Магілёва.

Канцэрт, які пачаўся а 17 гадзіне, прыцягнуў увагу немалой колькасці людзей. Зала Бельскага дома культуры была запоўнена да апошняга месца. Вялікае зацікаўленне конкурсам, як у Польшчы, так і ў Беларусі, было неспадзеўкай для арганізатараў. „Мы задаволены зацікаўленнем нашай імпрэзай і ўзроўнем падрыхтоўкі выканаўцаў, — сказаў Ігар Лукашук, адзін з арганізатараў „Бардаўскай восені”. — Нягледзячы на малады ўзрост, выканаўцы прадставілі спелыя песні пра рэчаіснасць, у якой прыйшлося нам жыць”.

Сапраўды, выканаўцы песень былі маладыя — у большасці гэта студэнты. Як у жартах казалі арганізатары, мерапрыемства можна назваць „Студэнцкай восенню бардаў”.

Вельмі ўразіла выступленне гурту „Гоман” з Гайнаўкі і Васіля Аўраменкі з Магілёва, які гумарам і іроніяй сваіх песень падбіў сэрцы бельскай публікі.

Узнагароду бурмістра Бельска-Падляшскага атрымала Вольга Стахвюк, а Бельскі аддзел БГКТ прызнаў дзве раўнапраўныя ўзнагароды Аляксандры Толкач і Андрэю Касценю (абое з Мінска). Апрача Андрэя Латушкіна, вылучэнні атрымалі Вольга Чумічова і Дзяніс Лісейчыкаў.

„Бардаўская восень” закончылася выступленнем сёлетніх і мінулагодніх лаўрэатаў пры бісах бельскай публікі. Два восеньскія вечары поўныя паэзіі ды настальгіі зрабілі ўражанне на моладзі бельскіх школ, якая складала большасць слухачоў. Шкада, што такія спатканні адбываюцца толькі адзін раз у год. Няма, аднак, лепшай пары чым восень на задуму над жыццём і самім сабой.