Міжнародная канферэнцыя ў Дубічах-Царкоўных

Паўліна ШАФРАН

— Канферэнцыю сарганізавалі мы па-першае, каб зрабіць больш цеснымі кантакты паміж жыхарамі Беласточчыны і Гродзеншчыны, — сказаў дырэктар ЦГА П-Б Яўген Вапа, — каб паміж намі былі як найлепшыя суадносіны. Па-другое, такія спатканні нечага вучаць, а ў гэтым выпадку хочам навучыцца найважнейшага для кожнай маленькай айчыны: як рабіць парадак навокал сябе, як гаспадарыць. А гэтым займаюцца самаўрады. Па-трэцяе: хочам, каб супрацоўніцтва адбывалася на месцы, каб можна было хутка дамовіцца з суседзямі з-за мяжы. Беларуская меншасць хутка знойдзе супольную мову з жыхарамі Гродзеншчыны, а гэта абазначае хуткі абмен інфармацыяй, завязанне карысных знаёмстваў, якія вядуць да паляпшэння фінансавай і палітычнай сітуацыі, пачынаючы ад найніжэйшых самаўрадавых узроўняў.

Галоўным спонсарам мерапрыемства было Брытанскае пасольства ў Варшаве. Удзельнікамі канферэнцыі былі дзеячы з Беларусі з розных асяроддзяў: юрысты, настаўнікі, эканамісты і журналісты. На працягу чыторох дзён мелі яны магчымасць пазнаёміцца з правіламі функцыянавання самаўрадавых структур на ўзроўні гмін і гарадоў.

У першы дзень на сустрэчах з Алесем Палескім і Маркам Жукоўскім госці даведаліся пра мясцовы рынак працы і самаўрады ў Польшчы пасля 1989 года. На другі дзень беларускія самаўрадавыя дзеячы пабывалі ў Нараўцы і Гайнаўцы. Візіт у Гайнаўскім белліцэі наглядна паказаў форму школьніцтва для беларускай нацыянальнай меншасці ў Польшчы. Пра заданні і кампетэнцыі гарадскіх улад расказаў бурмістр Гайнаўкі Анатоль Ахрыцюк і старшыня Рады горада Яўген Сачко. Удзельнікаў канферэнцыі ў Нараўцы прывітаў войт гміны Мікалай Павільч. Госці мелі магчымасць паглядзець амбулаторыю, керамічны завод, ачышчальню сцёкаў і школу, а таксама ў выніку наведання фірмы „Фарм-Агра” пазналі на практыцы польска-беларускае трансгранічнае супрацоўніцтва. Субота была трэцім днём канферэнцыі. Войт Дубіцкай гміны Анатоль Паўлоўскі і старшыня Рады гміны Ян Сурэль паказалі замежным гасцям гміну Дубічы-Царкоўныя. Апрача візіту на фермах страўсаў і авечак удзельнікі канферэнцыі наведалі калгас у Старым Корніне, дзе вялікае зацікаўленне выклікаў 16-перадатачны трактар. Спатканне ў гаспадароў Карчоў, якія гадуюць пад 20 кароў, выклікала шмат пытанняў. Госці цікавіліся колькасцю малака ад адной каровы, яго класамі і цаной ды рэнтабельнасцю гадоўлі. Затым наведалі прадпрыемства Рыгора Рыбака, які займаецца будовай драўляных дамоў у стылі шляхецкіх двароў і фірменны тартак. Пасля агляду рыбных ставаў (у гміне іх каля 100) удзельнікі канферэнцыі спаткаліся з настаяцелем, які расказаў гісторыю царквы ў Старым Корніне.

Пасля абеду Славамір Іванюк прадставіў ролю і заданні гарадскога дэпутата ў Бельску-Падляшскім, а пра ход выбарчай самаўрадавай кампаніі расказаў Міхал Андрасюк. Увагу слухачоў прыцягнуў Яўген Мірановіч дакладам пра беларускую нацыянальную меншасць у Польшчы. Трэці дзень удзельнікі сімпозіума закончылі пры вогнішчы, дзе разам з бельскім бардам Дарафеем Фіёнікам спявалі беларускія папулярныя песні.

Нядзеля была днём падсумавання і намячэння напрамкаў далейшага супрацоўніцтва.