Спевы над Бугам

Мікола ВАЎРАНЮК

— У нас больш сонечных дзён у год, чымсьці ў любой іншай мясцовасці ў Польшчы, — хваліць надвор’е войт Мельніцкай гміны Яўген Віхоўскі. — Можна ў гэтым пераканацца хаця б падчас нашага свята. Па ваколіцы ходзяць хмары, сям-там кропіць, а ў нас нічога, ані кроплі.

Свята ў Мельніку гэта Х Музычныя дыялогі над Бугам, якія з мінулага года сталі Агульнапольскай прэзентацыяй культуры нацыянальных меншасцей. Мерапрыемства праходзіла 11 і 12 жніўня, а сарганізавалі яго Управа гміны Мельнік, Таварыства сяброў Мельніцкай зямлі і Беларускае грамадска-культурнае таварыства.

— Датацыю на падобнае мерапрыемства выходжвалі мы ў Міністэрстве культуры некалькі гадоў, — кажа старшыня ГП БГКТ Ян Сычэўскі. — І толькі ў мінулым годзе дасталі першыя, невялікія грошы. Наша ініцыятыва зышлася са стараннямі самакіравання Мельніцкай гміны, якое старалася пераўтварыць украінскія Дыялогі над Бугам у сапраўдны дыялог розных культур, розных народаў. У мінулым годзе Саюз украінцаў Падляшша байкатаваў пераўтвораныя Дыялогі, тым не менш прайшлі яны паспяхова, а сёлетнія прэзентацыі атрымаліся яшчэ цікавейшымі, багацейшымі. На сцэне, якая атрымала новы выгляд і дах, прэзентуем беларускую, літоўскую, украінскую, расійскую, ромскую, грэцкую, кельцкую культуры. І польскую, бо наша імпрэза задумана менавіта як дыялогі культур розных нацыянальных меншасцей з культурай польскай.

Два дні ў амфітэатры „Тапаліна” над самым Бугам чуваць было самую розную музыку: фальклорную, эстрадную, дыска-пола. Выступалі дзеці і артысты, якім больш за 80 гадоў. Канцэртам прыглядалася і прыслухоўвалася ўся ваколіца. Публіка магла тут жа выпіць піва, з’есці каўбаску, але і набыць вырабы народных мастакоў з гліны, дрэва, саломы, лазы. Ды кніжкі, якія прывёз з Варшавы дырэктар Цэнтра славянскай кнігі Янка Заброцкі.

Хаця сёлетняе лета не распешчвала адпачываючых, над двухдзённым фэстам у Мельніку свяціла сонца.