Ніва № 31 (2307), 30 ліпеня 2000 г.

Вынікі падведзены

Віталь ЛУБА

Ужо вядомы вынікі V Агульнапольскага конкурсу беларускай паэзіі і прозы, аб’яўленага рэдакцыяй „Нівы” і Беларускім саюзам Рэспублікі Польшча. 13 ліпеня 2000 г. у Беластоку конкурсныя працы ацаніла камісія, якую састаўлялі: Надзея Артымовіч — паэтэса з Бельска-Падляшскага, Ежы Плютовіч — паэт з Беластока і Янка Трацяк — навуковы супрацоўнік Кафедры беларускай культуры Гродзенскага універсітэта. Камісія сцвердзіла, што на V Агульнапольскі конкурс беларускай паэзіі і прозы паступіла 45 прац, у тым ліку 8 у І групе (дзеці і моладзь пачатковых школ), 15 — у ІІ групе (моладзь сярэдніх школ) і 22 — у ІІІ групе (дарослыя).

У І групе — моладзь падставовых школ — два першыя раўнапраўныя месцы журы прысвоіла Кацярыне Ярашэвіч з Кнарыд („Аблачынка”) і Аляксандры Максімюк з Беластока („Мышка”); на другім месцы апынулася Анэта Галімская з Ягаднік („Ягада”).

У ІІ групе — моладзь сярэдніх школ — першым месцам журы надзяліла Юрку Буйнюка з Маліннік („Ясень”), другім — Барбару Казімярук з Елянкі („Бася ІІ”), а двума вылучэннямі — Мажэну Жменька („Мара”) і Юстыну Каралько („Рут”) з Бельска-Падляшскага.

У ІІІ групе — дарослыя — журы вырашыла ўзнагародзіць асобна аўтараў паэтычных і празаічных твораў. У галіне паэзіі першае месца атрымаў Уладзімір Саўчук з Беластока („Тамаш”), а вылучэнне — Анна Яканюк з Бельска-Падляшскага („Цётка Мальвіна”) за верш „Засушаныя кветкі”. У галіне прозы на першым месцы апынуўся Марк Рубашэўскі з Бельска-Падляшскага („Мані”), а на другім — Мікалай Лук’янюк з Бялкоў („Беленькі”). Вылучэннямі журы ўзнагародзіла Паўліну Шафран з Бельска-Падляшскага („Скарпіён”), Зінаіду Лукшу-Кавалевіч з Беластока („Кудзеля”) і Васіля Сакоўскага з Гайнаўкі („Выхавацель”).

Сярод аўтараў дасланых прац упершыню ў конкурсе прынялі ўдзел 10 асоб (І група — 5, ІІ — 2, ІІІ — 3). У ліку ўзнагароджаных апынуліся трое дэбютантаў: Аляксандра Максімюк, Паўліна Шафран і Васіль Сакоўскі.

Журы з прыкрасцю выявіла і дыскваліфікавала плагіятара, які даслаў дзве падборкі прац. Прыгадаем, што плагіят (лац. plagiatus — украдзены; plagium — крадзеж) — гэта прысваенне чужога твора або творчай ідэі, задумы, надрукаванне яго пад сваім прозвішчам, даслоўнае запазычанне з чужых твораў, апублікаванае як арыгінальнае і ўласнае; літаратурны, мастацкі, навуковы крадзеж; плагіятар — даслоўна: грабежнік — асоба, якая ўчыніла плагіят. „Наш” плагіятар пакарыстаўся творам „Жанчына ў пясках” японскага пісьменніка Абэ Коба. Відаць, не спадзяваўся, што члены журы ведаюць і японскую літаратуру.

Арганізатары плануюць на працягу 2-3 месяцаў выдаць зборнік лепшых конкурсных твораў і восенню наладзіць сустрэчу ўдзельнікаў конкурсу з членамі журы. Гэтая сустрэча стане нагодай для прэзентацыі літаратурнага зборніка — плёну V Агульнапольскага конкурсу беларускай паэзіі і прозы.