Купалле ў Белавежы

Міхась ХМЯЛЕЎСКІ

Белавежа напаўнялася тысячамі прыезджых. Паліцыя накіроўвала шафёраў на стаянкі.

Кожны калектыў прывёз з сабой у Белавежу арыгінальны купальскі вянок. Перад 21 гадзінай усе самадзейнікі выстраіліся ў шарэнгу і з песняй „Купалінка” рушылі ў кірунку амфітэатра. На перадзе карагода ішлі старшыня ГП БГКТ Ян Сычэўскі, яго намеснік Мікалай Нікалаюк і сакратар Валянціна Ласкевіч, ды войт гміны Станіслаў Куявяк. Купальскія вянкі ўскладваюцца на сцэне амфітэатра, з якой зноў загучала „Купалінка” ў дасканалым выкананні Юркі Астапчука, Багуславы Карчэўскай і Марка ды Мажэны Зрайкоўскіх. Спявалі яны і кідалі маленькія вяночкі, а людзі лавілі іх сардэчна.

— Пушча сэрца сваё адкрывае, — заявіла Валянціна Ласкевіч.

— Святкаваннем „Купалля” мы дэманструем яднанне чалавека з прыродай, з Белавежскай пушчай, бо пушча і чалавек — гэта сімбіёз, а людзі тут пражываючыя, спрыяюць пушчы, з’яўляюцца яе вялікімі прыяцелямі, — сказаў Ян Сычэўскі, затым прывітаў пасла Рэспублікі Беларусь у Польшчы Мікалая Крэчку з жонкай, генеральнага консула РБ у Беластоку Паўла Латушку з жонкай і ўсіх працаўнікоў консульства, паслоў Сейма РП Сяргея Плеву з жонкай і Вацлава Оляка з Варшавы, старшыню Пружанскага райвыканкама Аляксандра Юркевіча, войтаў і бурмістраў.

Купальскі канцэрт пачаў „Расспяваны Гарадок” абрадавай сцэнкай, у якой выступалі міфалагічныя сілы прыроды: Лясун, Русалка, Вадзянік. Нават дырыжор Сцяпан Копа захапіў прысутных, калі разам з Ірэнай Паўлючук праспяваў „Папараць-кветку”. Гарадоцкая пастаноўка была новым элементам у купальскім канцэрце.

Беластоцкія хоры „Крыніца” і „Каласкі” паказалі прыгажосць беларускай песні і музыкі, а эстрадныя гурты „Ас”, „Прымакі”, „Лідэр” з Беластока і „The Best” з Сямятыч заахвоцілі многіх да танцаў.

З вялікай увагай публіка паставілася да выступленняў „Васілёчкаў” з Бельска-Падляшскага, „Чыжавян” з Чыжоў, „Цаглінак” са Старога Ляўкова, „Красуняў” з Краснага Сяла, „Журавінак” з Агароднічак, „Арэшкаў” з Арэшкава, „Рэчанькі” з Козлікаў, „Хлопцаў-рыбалоўцаў” з Рыбалаў, хору Гайнаўскага дома культуры, Алы Каменскай з яе сынам Давідам Дубцом і асабліва бельскай „Маланкі”. Усе калектывы выконвалі па дзве беларускія песні. Вельмі цёпла ўспрыняты былі выступленні самадзейнікаў з Беларусі. Салістка Ніна Пора, дуэт — Таццяна Цюшкевіч і Ірына Прытуляк, мужчынскі квартэт „Мужыкі” і жаночы „Клепачанка” і хор „Забава” — усе з Пружан, а таксама хор „Крыніца” з вёскі Бакуны на Пружаншчыне так спадабаліся прысутным, што тыя не шкадавалі ім працяглых і моцных воплескаў. Але найбольшае захапленне выклікаў дзіцячы танцавальны калектыў „Спадчына” з Пружан. Прадстаўляе ён сапраўдны высокае танцавальнае майстэрства.

Купальскі канцэрт працягваўся больш за тры гадзіны. Недзе ў сярэдзіне мерапрыемства вядучая канцэрт Валянціна Ласкевіч падзякавала ўсім спонсарам, якія прыйшлі з фінансавай дапамогай арганізатарам і адначасова выказала смуткаванне, што ваяводскія ўлады Падляшскага ваяводства не прызначылі на „Купалле” ні залатоўкі, таксама як і на Свята беларускай культуры ў Беластоку. Гэтая інфармацыя была прынята прысутнымі з абурэннем.

Канцэрт закончыўся і пачаўся карагод. З песняй „Купалінка” ўсе калектывы панеслі прыгожыя вянкі, асветленыя свечкамі, над рэчку Нараўку і апусцілі іх на ваду. І паплылі яны быццам міргаючы да людзей, быццам выказваючы падзяку ім, што ўшаноўваюць народную беларускую земляробчую традыцыю.

А што было далей? Распачалася танцавальная забава там, дзе адбываўся канцэрт пад музыку гурту „Лідэр” з Беластока. А многія паехалі ў Старую Белавежу і пры вогнішчы прадаўжалі купальскае святкаванне. Але ніхто не хадзіў у пушчу шукаць папараць-кветку, не пераскокваў цераз вогнішча. Усе калектывы і госці бавіліся да світанку пры вогнішчы, частаваліся, спявалі, танцавалі, замацоўвалі прыязнь і знаёмства. І я там быў, і сок піў, і бавіўся так як усе, па-беларуску.