Алімпіяда пад бел-чырвона-белым сцягам

Зміцер КІСЕЛЬ

Урачыстае адкрыццё Алімпіяды адбылося 21 траўня каля Каложскай царквы, дзе ўстаноўлены знак „Пагоня на Грунвальд”. Моладзь запаліла паходні і намеснік старшыні гродзенскага Маладога фронту Вадзім Cаранчукоў падняў на высокі флагшток бел-чырвона-белы сцяг. Спаборніцтва пачалося. Прадстаўнікі маладзёжных арганізацый, якіх звычайна можна ўбачыць на мітынгах, пікетах, розных адукацыйных семінарах бегалі, стралялі, кідалі гранаты. Найбольшую цікавасць выклікалі групавыя віды спорту. Гэта і зразумела, бо тут кожная арганізацыя мела магчымасць „пахварэць” за сваю каманду. Лепшымі футбалістамі сталі хлопцы з „Нашай салідарнасці”. Арыгінальна выглядала каманда „Апошнія яцвягі”, якая складалася з „ветэранаў” (выпускнікоў мінулых гадоў гістарычнага факультэта Гродзенскага універсітэта). Дарэчы, яны занялі трэцяе месца. Анархісты найлепш гуляюць у валейбол, а маладафронтаўцы — у баскетбол.

У апошні дзень Алімпіяды былі самыя цікавыя конкурсы: выбары найпрыгажэйшай дзяўчыны, якой стала Оля Камягіна і конкурс бардаў. Апошні, праўда, ператварыўся ў канцэрт, бо толькі два хлопцы Валера Руселік і Слава Жукаў згадзіліся прадэманстраваць свой талент. Андрэй Мельнікаў, які прыехаў у Гродна як сябра журы, стаў сапраўднай зоркай канцэрта. Нават пасля афіцыйнага заканчэння Алімпіяды, калі ўрачыста быў спушчаны бел-чырвона-белы сцяг, моладзь больш гадзіны не адпускала знакамітага барда.