„Не получится господин Вик”

Зміцер КІСЕЛЬ

Лукашэнка заклікаў апазіцыю прыняць удзел у парламенцкіх выбарах і заявіў, што ўлады бяруць на сябе абавязацельства ў час арганізацыі і правядзення выбараў не рабіць дзеянняў, якія пагоршаць умовы дзейнасці апазіцыі. У сваю чаргу апазіцыя павінна ўстрымацца ад дзейнасці, якая, на думку Лукашэнкі, парушае закон і прыносіць страты знешнепалітычным і знешнеэканамічным інтарэсам дзяржавы. Але пра павышэнне паўнамоцтваў парламента, што з’яўляецца асноўным патрабаваннем апазіцыі, гаворка не ішла. Больш таго, даючы абавязацельства, Лукашэнка працягваў лаяць апазіцыю апошнімі словамі і пагражаць ёй Саветам Бяспекі. Галоўным абвінавачваннем было атрыманне дапамогі з Захаду. Лукашэнка сказаў, што можа расказаць хто і колькі атрымоўвае, але чамусьці не сказаў. Гэта вельмі нагадвала яго перадвыбарчую кампанію, калі ён казаў пра „чэмаданы кампраматаў”, якія ніхто так і не ўбачыў. А кіраўнік групы АБСЕ ў Беларусі, Ганс Георг Вік, які прысутнічаў на сустрэчы і нават прамаўляў, быў абвінавачаны ледзь не ў падрыўной дзейнасці. Лукашэнка відаць так захапіўся сваім аратарскім талентам, што забыўся хто перад ім і размаўляў з Вікам як са старшынёй беларускага калгаса. Напэўна ўяўляючы ў асобе кіраўніка групы АБСЕ ўвесь Захад і беларускую апазіцыю ён сцвердзіў, што ў Віка нічога не атрымаецца.