Лукашэнка робіць чарговы ход

Зміцер КІСЕЛЬ

Беларуская апазіцыя даволі стракатая, аб’ядноўвае розных па светапоглядзе людзей. Усё большую ролю сярод апазіцыйных сілаў пачынаюць гуляць так званыя „пакрыўджаныя”, якія ў свой час прывялі Лукашэнку да ўлады. Магчыма на іх і на АБСЕ разлічаны апошні палітычны ход Лукашэнкі. Днямі ён заявіў, што напрыканцы мая сам прыме ўдзел у дыялогу і нават вынясе ў свой кішэнны парламент прапановы зменаў у выбарчы закон, якія выпрацаваны падчас „дыялогу”. Гэтыя змены былі агучаны беларускім тэлебачаннем. 30% складу выбарчых камісій аддаюцца палітычным партыям, на выбарах змогуць прысутнічаць назіральнікі, разглядаецца пытанне пра змяненне сістэмы датэрміновага галасавання. Улады не хаваюць, што яны вельмі жадаюць, каб на сустрэчы з Лукашэнкам прысутнічалі прадстаўнікі апазіцыйных партый. А галоўнае, каб гэтыя партыі ці вядомыя апазіцыйныя палітыкі ўдзельнічалі ў выбарах.

Паўстае небяспека, што некаторыя „пакрыўджаныя” могуць на гэта пайсці. Тады рэжым можа святкаваць перамогу. Лукашэнка нават выдзеліць для „апазіцыі” некалькі месцаў у сваім парламенце, дзе „апазіцыянеры” змогуць трохі пакрычаць. Але парламент застанецца такім жа бяспраўным. Затое яго можа прызнаць Захад. Наступным крокам стане прызнанне прэзідэнцкіх выбараў па лукашэнкаўскім сцэнарыі, затым паглыненне Беларусі Расіяй. Зараз усё залежыць ад тых палітыкаў, для якіх галоўнае не асабістая кар’ера, а Беларусь. На жаль, такія людзі паступова адыходзяць на другі план.