Амерыканскія кангрэсмены раззлаваліся

Змiцер КІСЕЛЬ

Поўны тэкст рэзалюцыі быў надрукаваны ў газеце „Наша воля” 11 мая. Ён даволі вялікі. Змяшчае шэраг тлумачэнняў зыходзячы з чаго кангрэсмены выступаюць так рэзка. Між іншым узгадваецца рэферэндум 1996 года, дзякуючы якому Аляксандр Лукашэнка незаконна павялічыў тэрмін свайго знаходжання пры ўладзе на два гады. Канстатуецца, што „Беларусь пераўтварылася ў аўтарытарную паліцэйскую дзяржаву, дзе рэгулярна парушаюцца правы чалавека”. Прыводзяцца прыклады знікнення шэрагу вядомых апазіцыйных дзеячаў, вымушанай эміграцыі Сямёна Шарэцкага, збіцця і арыштаў дэманстрантаў 17 кастрычніка мінулага года і 25 сакавіка г.г. Што датычыць расійскай дапамогі рэжыму Лукашэнкі, амерыканскія кангрэсмены сцвярджаюць, што яна дазваляе ўтрымліваць шматлікі паліцэйскі апарат і кантраляваць эканоміку. Згодна рэзалюцыі гэтая дапамога ў 1996 і 1997 гадах склала ад 1,5 да 2 млрд. долараў ЗША. А саюзная дамова „парушае гарантыі незалежнасці, якія Барыс Ельцын падпісаў у 1994 г. на снежаньскім саміце кіраўнікоў дзяржаў Арганізацыі па бяспецы і супрацоўніцтве ў Еўропе” ў Будапешце (Венгрыя). Непакоіць кангрэсменаў і магчымае вяртанне на Беларусь ядзернай зброі, што з’явіцца парушэннем Дамовы пра нераспаўсюджванне ядзернай зброі падпісанай беларускім кіраўніцтвам.

Палата прадстаўнікоў Кангрэса між іншым пастанавіла асудзіць парушэнні правоў чалавека на Беларусі, заклікаць міжнародную супольнасць падтрымаць беларускую апазіцыю, падтрымаць суверэнітэт, незалежнасць і тэрытарыяльную цэласнасць Беларусі. Рэзалюцыя заклікае прэзідэнта ЗША забяспечыць супрацоўніцтва з беларускай апазіцыяй, падтрымку незалежных СМІ, падняць пытанне пра непрадстаўленне расійскім кіраўніцтвам дапамогі рэжыму Лукашэнкі на самым высокім узроўні, запатрабаваць, каб расійскі ўрад забяспечыў павагу суверэнітэту Беларусі, „асабліва ў святле нелегітымнасці рэжыму Лукашэнкі”.

Час пакажа, ці паўплывае рэзалюцыя, асабліва калі яе прыме і Сенат ЗША, на дзеянні Лукашэнкі і Пуціна. Некаторыя беларускія апазіцыйныя палітыкі песімістычна сцвярджаюць, што сапраўднай прычынай рашэнняў кангрэсменаў стала пагаршэнне адносін ЗША з Расіяй, як толькі яны палепшацца, рэзалюцыя № 304 можа стаць звычайнай паперкай. Але нельга забываць і пра тое, што рашаючае слова за беларускай апазіцыяй. На жаль, можна канстатаваць, што „Вясна-2000”, на якую беларуская апазіцыя мела шмат спадзяванняў, скончылася таксама як і мінулагоднія „вёсны”.