Артыкулы квартала

Ганна КАНДРАЦЮК

Завяршыўся трэці выпуск конкурсу для карэспандэнтаў „Зоркі” — „Артыкулы квартала”. Урачыстае падвядзенне вынікаў адбылося 1 красавіка г.г. у нашай рэдакцыі.

Узнагароду чытачоў (30 балаў у плебісцыце) атрымаў артыкул „Грабавец стаў на ногі за каробкі”.

Аўтары, навучэнцы і выпускнікі ПШ у Дубічах-Царкоўных — Барбара Андраюк, Мажэна Бадавец, Тамаш Жак, Кася Младзяноўская, Андрэй Пракапюк, Марта Саевіч, Данель Рута, Кася Рыбак і Моніка Старасельнік — правялі інтэрв’ю з жыхаркай Грабаўца Нінай Младзяноўскай.

— Думка, каб правесці гэтае інтэрв’ю выйшла ад самой моладзі, — успамінае Бася Андраюк. — Мы дамовіліся і сустрэліся ў Грабаўцы, дзе жыве наша гераіня. Пытанні прыдумвалі ўсе, нам, проста, цікава размаўлялася з Нінай Младзяноўскай.

Згаданае інтэрв’ю ўзнікла ў час канікул. Варта адзначыць і тое, што большасць аўтараў была ўжо выпускнікамі ПШ у Дубічах-Царкоўных.

— Супольная праца над артыкулам была добрым спосабам на правядзенне вольнага часу.

Артыкул дубіцкіх навучэнцаў вылучаўся таксама адносінамі да рэгіянальных каштоўнасцей. Ды і не толькі... У адным з пытанняў гучыць сумная канстатацыя — беларуская вёска са сваімі каштоўнасцямі адмірае. Маладыя аўтары выяўляюць таксама склад грамадскай думкі.

Увесь калектыў атрымаў грамату і элегантныя сюрпрызы — арганізатары для планавання дзейнасці і часу (тыя, што не даехалі на конкурс, могуць узяць узнагароды ў нашай рэдакцыі).

ІІІ выпуск конкурсу датычыў артыкулаў, надрукаваных на нашых старонках ад 30 мая да 29 жніўня 1999 года. Сярод 29 допісаў назначэнні атрымалі 10 артыкулаў. Сарод іх былі такія формы журналістыкі як рэпартаж, інтэрв’ю, фельетон, прэсавая інфармацыя, эсэ ды літаратурныя спробы.

Узнагароду галоўнага рэдактара „Нівы” Віталя Лубы атрымаў Міхась Сцепанюк за нарыс „Забытая трагедыя”. Узнагароджанае эсэ датычыла малавядомай тэмы — бежанства. Гэтаму самаму аўтару прысвоена ўзнагарода рэдактара літаратурнай старонкі. Міраслава Лукша ўзнагародзіла фельетон „Вінаватыя каровы”. Падвойны лаўрэат атрымаў граматы, сюрпрыз-арганізатар і беларускі пераклад Гётэ.

Варта адзначыць, што артыкулы Міхася Сцепанюка друкаваліся ўжо на старонках „Нівы” і ў агульнапольскім часопісе маладых журналістаў „Polis”. Міхась Сцепанюк з’яўляецца вучнем бельскага беларускага ліцэя. З „Зоркай” супрацоўнічае ўжо шосты год.

Патрыцыя Кос, зараз вучаніца гайнаўскага белліцэя, атрымала ўзнагароду сакратара рэдакцыі за рэпартаж „Сталіца нашых сэрц”.

— Мая ўзнагарода — у асноўным за адвагу аўтаркі ў выказванні асабістых адносін да апісванай тэмы, — сказаў Аляксандр Максімюк.

Рэпартаж Патрыцыі Кос расказвае пра падарожжа ласінскіх „Лісічак” у Мінск. У той час аўтарка была вучаніцай ПШ у Ласінцы. Нярэдка цікавыя заўвагі падказвалі сябры-спадарожнікі. Гэта яны паклалі спадзяванні ў журналісцкім таленце Патрыцыі ды горача падтрымоўвалі яе ў час пісання артыкула.

Міхась Матэнька, вучань ПШ н-р 3 у Бельску-Падляшскім атрымаў узнагароду „Зоркі” за допіс „Мая бабуля”. Міхась, будучы вучнем трэцяга класа надзвычай пластычна і трапна апісаў хатку і сялібу сваёй бабулі ў Райску. Апрача граматы наймалодшы ўдзельнік конкурсу атрымаў сюрпрыз-арганізатар.

Варта адзначыць, што ўсе аўтары, вылучаны ў III выпуску конкурсу, атрымалі ўзнагароды. Ужо само вылучэнне з’яўляецца вялікім прызнаннем магчымасцей і здольнасцей аўтара. Вылучаючы найлепшыя артыкулы, рэдакцыя заахвочвае сваіх аўтараў да творчай працы.

* * *

Згодна з прынцыпамі конкурсу мы разыгралі ўзнагароды чытачам, якія прынялі ўдзел у плебісцыце:

— гадавую падпіску на „Ніву” выйграла Ася Леанюк з Грабаўца,

— касеты з запісам беларускіх гуртоў: Казімір Радошка са Свебадзіцаў і Міхал Байко з Беластока.

* * *

Нашы спонсары: Цэнтр грамадзянскай адукацыі Польшча-Беларусь, Польскі фонд дзяцей і моладдзі.