Ніва № 12 (2288), 19 сакавіка 2000 г.

Ці будуць пасля „Вясны” плёны

Зміцер КІСЕЛЬ

Ужо стала традыцыяй, што на пачатку вясны беларуская апазіцыя рыхтуе транспаранты і сцягі для масавых акцый пратэсту, а міліцыя — дубінкі і газ для іх разгону. Аднак сёлетняя „Вясна-2000” на думку апазіцыйных лідэраў павінна кардынальна адрознівацца ад мінулых. Пачынаючы з 1996 года ўсё ішло па накатаным сцэнарыі. Нешматлікі мітынг у Мінску 15 сакавіка, больш шматлюдны мітынг і шэсце 25 сакавіка, амаль тое ж 2 красавіка, кульмінацыя падзей 26 красавіка і ўсё канчалася ў маі. Вынікі: сотні збітых міліцыяй самаахвярных патрыётаў Беларусі, дзесяткі арыштаваных і аштрафаваных. У гэтым годзе лідэры апазіцыі разлічваюць на змену сітуацыі ў краіне.

Падрыхтоўку „Вясны-2000” узялі на сябе палітыкі „новай хвалі” арганізатары „Маршу Свабоды”, які адбыўся ў Мінску 17 кастрычніка мінулага года. Сярод іх кіраўнікі „Хартыі-97”, АГП, БСДП, незалежных прафсаюзаў і БНФ. Аднак, акрамя апошняга, гэтыя арганізацыі ніяк нельга назваць масавымі. А Народны фронт не карыстаецца поўным даверам у моладзі, якая была галоўнай дзеючай сілай падчас падзей 17 кастрычніка. Але ўдзел у першым „Маршы Свабоды” некалькі дзесяткаў тысяч людзей, пагаршэнне эканамічнага становішча ў краіне дае надзею арганізатарам, што на „Марш Свабоды-2” прыйдзе да ста тысяч чалавек. Правесці акцыю плануецца 15 сакавіка, нягледзячы на тое, што для тысяч шэраговых фронтаўцаў і маладых патрыётаў дзень прыняцця Канстытуцыі Вярхоўным Саветам 12 склікання мае значна меншае значэнне, чым Дзень незалежнасці 25 сакавіка. Арганізатары тлумачаць гэта тым, што 15 сакавіка будзе толькі пачаткам „Вясны-2000”.

Між тым ужо пачалася падрыхтоўка да адзначэння Дня незалежнасці. Кіраўніцтва БНФ падало заяўку на правядзенне „Дня Волі-2000” у Мінскі гарвыканкам. Тое ж робіцца ў іншых буйных гарадах Беларусі. Так у Гродне адказнасць за акцыю бяруць на сябе мясцовыя філіі БНФ і БСДГ. Адкрыты ліст да беларускага народа даслала старшыня Рады Беларускай Народнай Рэспублікі Івонка Сурвіла. Яна піша, што напярэдадні найвялікшага нацыянальнага свята беларусаў „хачу падзяліцца з Вамі маім болем і маёй трывогай за Вашу будучыню і за будучыню Вашых дзетак і ўнукаў”. Старшыня Рады БНФ заклікае беларусаў 25 сакавіка сотнямі тысяч выходзіць на вуліцу.

Напэўна да вясновых падзей рыхтуюцца і ўлады. А што ад іх чакаць можна зразумець зыходзячы з прызнанняў старэйшага лейтэнанта міліцыі Алега Батурына, які не вытрымаў, што яго выкарыстоўваюць у злачынных мэтах і напісаў у газету „Народная воля” адкрыты ліст да сваіх калегаў. У ім ён расказаў, якія задачы ставіліся перад ім падчас „Маршу Свабоды” 17 кастрычніка. Згодна з яго сведчаннямі падчас дэманстрацыі трэба было яму правакаваць сутычкі з міліцыяй, ідучы ў калоне пад выглядам удзельніка акцыі. Ён асабіста атрымаў каманду па рацыі „прыціснуць” людзей да месца дзе ляжалі камяні.