Пуцін — пагроза ці палёгка?

Зміцер КІСЕЛЬ

Ці здушыўшы Чачню Расія возьмецца за Беларусь? Або наадварот, саюзная дамова застанецца толькі на паперы? У снежні Лукашэнка сказаў, што хоча падпісаць дамову аб адзінай дзяржаве менавіта з Ельцыным. Зараз гэта ўжо немагчыма. У сваёй навагодняй прамове Лукашэнка сказаў, што саюз з Расіяй база для далейшага развіцця двух краін і народаў. Пра адзіную дзяржаву нічога не гаварылася. А адстаўку Ельцына ён назваў палітычнай стратай для сябе асабіста. Указам № 785 Лукашэнка ўзнагародзіў адстаўнога расійскага прэзідэнта ордэнам Скарыны.

А 3 студзеня Лукашэнка размаўляў з Пуціным па тэлефоне. Яны дамовіліся, што няма неабходнасці мяняць палітыку ўзаемаадносін паміж абедзвюма дзяржавамі, а таксама аб сустрэчы ў бліжэйшы час.

Дык што прынясе Беларусі змена ўлады ў Крамлі — карысць ці небяспеку? Свае меркаванні выказваюць намеснік старшыні БНФ Юры Хадыка і старшыня Аб’яднанай Грамадзянскай партыі Станіслаў Багданкевіч.

— Дзякуй Богу не карысць і не небяспека, — кажа Юры Хадыка. — Гэта сведчанне пра складанае становішча ў палітычным жыцці Масквы. З аднаго боку добра, што дарога на расійскі пасад Лукашэнку закрыта. Пуцін хоча праз тры месяцы стаць паўнавартасным прэзідэнтам і ў Крэмль яго не пусціць. Лукашэнка павінен будзе весці больш незалежную палітыку.

З другога боку, мы яшчэ раз упэўніліся, што імперскія ідэі ў Маскве ажыццяўляюцца супрацоўнікамі КДБ. Таму Расія і надалей будзе праводзіць праімперскую палітыку, як гэта адбываецца ў Чачні.

— Адназначна адказаць не магу, — кажа Станіслаў Багданкевіч. — У Ельцына і Пуціна адзіная пазіцыя ў адносінах да саюза з Беларуссю. Калі Беларусь сама не адстаіць суверэнітэт, дык гэтага не зробіць ніхто.

Адзіны плюс, што Пуцін прадстаўляе больш маладое пакаленне, больш ліберальна-дэмакратычнае. Ёсць інфармацыя, што Масква патрабуе ад Лукашэнкі легітымізацыі ўлады, правядзення дэмакратычных выбараў прэзідэнта і парламента.

Тое, што Пуцін прадстаўнік КДБ, не будзе адыгрываць вялікага значэння. Адзінае, што палітыка, якая праводзіцца ў Чачні бескампрамісная, вялікадзяржаўная.

У эканоміцы ён абапіраецца на Кірыенку, Чубайса, Нямцова, якія прытрымліваюцца рынкавай эканомікі. Перамога Пуціна — гэта будучыня Расіі. Рынак — еўрапейскі, а не азіяцкі шлях развіцця.

У гэтым ёсць станоўчы факт для Беларусі. Яна крок за крокам можа вызваліцца ад таталітарызму.