Пачала вяшчаць „Рацыя”

Аляксандр МАКСІМЮК

Захады аб стварэнні беларускамоўнай радыёстанцыі ў Беластоку цягнуліся сама менш год часу. Прашэнне пра канцэсію на вяшчанне было фармальна пададзена ў Краёвую раду радыёвяшчання і тэлебачання ў пачатку 1999 г. Навосень гэтага ж году Краёвая рада выдзеліла частотнасці. Пайшла арганізацыйная праца па стварэнні радыёцэнтра ў Беластоку — знаходзіцца ён цяпер па вул. Цеплай 1. Супрацоўнікі радыёстанцыі набіраліся на конкурснай аснове. Усіх іх каля дзесятка чалавек.

Радыёстанцыяй „Рацыя” кіруе суполка з такою ж назвай, большасць удзелаў у якой мае Беларускі саюз у Рэчы Паспалітай. Прадстаўніком Саюза ў радзе суполкі з’яўляецца Алег Латышонак. Ён у першым выпуску звярнуўся да слухачоў, кажучы, што гісторыя ўзнікнення радыёстанцыі — гэта гісторыя змагання. Нешта ў гэтым ёсць, бо ўсе мы памятаем, што „Рацыю” асудзілі і засудзілі яшчэ да выхаду ў эфір першай радыёперадачы. Даказвае гэта толькі, што кожная беларуская незалежная ініцыятыва ў Польшчы ўспрымаецца з некаторай (мякка кажучы) істэрыкай — перш за ўсё, з боку асоб, якія ў іншых кантэкстах гатовы біцца ў грудзі „я таксама беларус”. Можна толькі мець надзею, што выхад перадач у эфір канчаткова скарэктуе ўсякую паклёпніцкую міфалогію, а перадачы будуць ацэнены адзіным верагодным суддзёю — слухачамі.

„Рацыя” меціць вельмі высока, бо хопіць узяць на роздум толькі адну акалічнасць — вяшчанне сваё пачала з гадзіннай перадачы штодзённа. А нарыхтоўваецца тая перадача ў даволі партызанскіх умовах — радыёцэнтр не мае пакуль ані кабельнай сувязі з транслятарам, ані ўнутрырэдакцыйнай камп’ютэрнай сеткі. Рэдактарам трэба кампанаваць праграму з кучы дыскаў, а наканец усё запісаць на адзін дыск ды завезці яго на машыне да транслятара. Але трэба сцвердзіць і тое, што рэдактарам удаецца нарыхтаваць на час гэты гадзінны блок. Заўважу яшчэ, што ў падобных умовах не так даўно нараджаўся беластоцкі тэлецэнтр. Паволі, але паступова ўсё ўстанавілася ў свае каляіны. Тое ж будзе і з радыёстанцыяй „Рацыя”. Патрабуецца настойлівасць і цярплівасць.

„Рацыя” акрамя ўсяго гэтага мае сваё вельмі канкрэтнае грамадскае значэнне. Радыёстанцыя дае працу ладнай грамадцы моладзі, якая ў змозе і размаўляць па-беларуску, і выявіць свае журналісцкія здольнасці. У іншых абставінах той жа моладзі трэба было б шукаць занятак у іншых дзялянках, у якіх наўрад ці можна было б выявіць сваю беларускасць.