Ніва № 52 (2276), 26 снежня 1999 г.

Візіт беларускіх дэпутатаў

Валеры САЎКО

У чацвер, 16 снежня, закончыўся афіцыйны візіт старшыні Вярхоўнага Савета Рэспублікі Беларусь 13 склікання Сямёна Шарэцкага ў Польшчу. Беларуская дэлегацыя прыбыла ў Варшаву па запрашэнні маршалка Сейма Мацея Плажынскага. У яе склад уваходзілі яшчэ дэпутаты Вярхоўнага Савета Станіслаў Шушкевіч ды Генадзь Цярэня, а таксама Хведар Нюнька — старшыня Беларускага культурнага таварыства Літвы. Візіт працягваўся 3 дні. Беларускія парламентарыі сустрэліся з многімі палітыкамі Польшчы. Станіслаў Шушкевіч заўважыў, што дэлегацыя мела напружаны графік. Дэпутаты былі прыняты маршалкам Сейма Мацеем Плажынскім, сустрэліся з віцэ-маршалкамі Сейма і Сената, са сваімі польскімі калегамі з розных фракцый ніжэйшай палаты парламента, віцэ-міністрам замежных спраў Пшэмыславам Грудзінскім. Аднак найважнейшым пунктам была аўдыенцыя ў прэзідэнта Польшчы Аляксандра Кваснеўскага. На жаль, сустрэча з кіраўніком польскай краіны была зачынена для прэсы і мела неафіцыйны характар. Аўдыенцыя працягвалася паўгадзіны і можна здагадвацца, што перш за ўсё была закранута тэма сітуацыі ў Беларусі. Тым больш, што Станіслаў Шушкевіч у інтэрв’ю зазначыў важнасць слоў прэзідэнта Кваснеўскага на сустрэчы ў вярхах АБСЕ ў Стамбуле, які — як адзіны кіраўнік дзяржавы -ўдзельніцы сустрэчы — востра, але ў дыпламатычнай форме, скрытыкаваў улады Беларусі за парушэнні правоў чалавека і адсутнасць дэмакратычных прынцыпаў. Станіслаў Шушкевіч зазначыў таксама, што візіт з’яўляецца прыкладам супрацоўніцтва паміж заканадаўчымі ўладамі Беларусі і Польшчы, дадаўшы адначасова, што выканаўчая ды нават судовая ўлады разумеюць сітуацыю ў Беларусі, а прыкладам гэтага могуць быць рашэнні польскіх судоў, якія адмовіліся выдаваць беларускім праваахоўным органам некаторых грамадзян, якія праследуюцца за тое, што не падтрымліваюць рэжым.

Старшыня Вярхоўнага Савета Сямён Шарэцкі аптымістычна глядзіць на супрацоўніцтва паміж польскімі і беларускімі парламентарыямі. „Аднак, калі гаварыць пра сітуацыю ў Беларусі, то тут не да аптымізму”, — зазначае кіраўнік беларускага парламента, дадаючы, што сітуацыя можа пагоршыцца, калі распачнецца рэалізацыя нядаўна падпісанага беларуска-расійскага пагаднення. Сямён Шарэцкі з задавальненнем успрымае факт, што яшчэ раз атрымаў пацвярджэнне з боку польскіх сенатараў і паслоў: адзінай заканадаўчай, правамоцнай, а пасля 20 ліпеня і легітымнай уладай у Беларусі з’яўляецца Вярхоўны Савет 13 склікання.

Падчас сустрэч былі разгледжаны і канкрэтныя прапановы, між іншым, стварэнне міжнароднай парламенцкай асамблеі, ініцыятарам стварэння якой выступілі дэлегаты літоўскага парламента. У склад асамблеі ўваходзілі б парламентарыі Польшчы, Беларусі, Украіны, Латвіі і Літвы. Мэта яе — назіранне за развіццём падзей у Беларусі, аналізаванне сітуацыі ды падтрымка працэсаў, накіраваных на дэмакратызацыю беларускага грамадства. Паводле праектаў, сакратарыят асамблеі знаходзіўся б у Вільні. Члены дэлегацыі пазітыўна ацанілі вынікі візіту ў Польшчу, падкрэсліваючы, што яны ўпэўнены ў далейшым супрацоўніцтве са сваімі польскімі калегамі.