„Край” змагаецца за Беларусь

Зміцер КІСЕЛЬ

— Мы ўбачылі, што кола лідэраў сфармавана. Прыйшоў час пашыраць арганізацыю, рабіць яе больш масавай, — тлумачыць сітуацыю прадстаўнік „Краю”. — Ва ўмовах поўнай канспірацыі гэта зрабіць складана. Падзеі 17 кастрычніка паказалі, што шмат маладых хлопцаў падзяляюць нашы погляды, аднак, не ведаюць да каго звярнуцца, каб сумесна змагацца за незалежнасць Беларусі, яе гонар і славу.

Аднак разумеем, якая зараз сітуацыя ў краіне і ад канспірацыі не адмаўляемся. Усе нашы сябры маюць псеўданімы. Летам, падчас аднаго з абучэнняў мы наведалі Жыровіцкі манастыр, дзе ўдзельнічалі ў малебне. Калі святар папрасіў сказаць нашы імёны, каб памаліцца за нас, дык аказалася, што як завуць адзін аднаго не ведаем. Але малебен адбыўся. Уражанне было вельмі моцнае і не толькі для нас. У аднаго семінарыста на вочы слёзы накаціліся. Ён сказаў: „Хлопцы! Я думаў я адзін такі. Я за вас увесь час маліцца буду”.

— Вашы адносіны да рэлігіі сапраўды ўражваюць. Кожная справа пачынаецца з сумеснай малітвы. Зараз рэдка гэта можна ўбачыць нават у асяроддзі старых людзей. Але сярод вас вернікі розных канфесій, а перавага, здаецца, надаецца праваслаўю.

— Не зусім так. „Край” кіруецца прынцыпамі хрысціянскай маралі. На жаль, у Беларусі не было нацыянальнай царквы, што не дазволіла ў мінулым ўзнікнуць моцнай і згуртаванай эліце. Стварыць такую эліту наша задача, а без духоўнасці гэта немагчыма. Мы наладжваем кантакты з усімі канфесіямі. На жаль, для кіраўніцтва Рускай праваслаўнай царквы ідэя беларускай незалежнасці неўспрымальная. Наш жа кліч: Бог, Беларусь, Воля! Наша мэта: Беларуская Незалежная Нацыянальная Дзяржава — дзяржава беларускай нацыі на беларускай зямлі. Але сярод кліру Рускай праваслаўнай царквы таксама ёсць патрыёты Радзімы. Прыклад — згаданы раней жыровіцкі семінарыст.

— Не баіцеся, што вас абвінавацяць у нацыяналізме?

— А мы і ёсць нацыяналісты. У нармальным сэнсе гэтага слова. Людзей іншых нацыянальнасцей, якія разам з намі змагаюцца за незалежнасць Беларусі, лічым сваімі братамі. Да тых, хто падтрымлівае нашу барацьбу, ставімся талерантна. А тыя, хто выступае супраць беларускага нацыянальнага адраджэння — нашы ворагі. „Край” адмаўляе імперыялізм і шавінізм, камунізм і фашызм, касмапалітызм і псеўданацыяналізм.

— Ці не з’яўляецца для сяброў „Краю” галоўным фізічная падрыхтоўка?

— Прапаганда фізкультуры і спорту, здаровага ладу жыцця адна з задач арганізацыі. „Краёвец” павінен у любой сітуацыі пастаяць за сябе і за сваіх сяброў. Усё лета праводзім у вышкаленчых лагерах дзе-небудзь у лесе. Адбываюцца марш-кідкі па ўсёй Беларусі, навучанне рукапашнаму бою і г.д. Але разам з фізічнай падрыхтоўкай адбываецца ідэалагічнае выхаванне. Мы лічым, што зацвярджэнне ў грамадстве беларускай нацыянальнай ідэі — жыццёвая неабходнасць. Пакуль гэта ідэя не стане вызначальнай для ўладаў, палітычных сілаў, грамадства ў цэлым, не будзе ў Беларусі адзінства народаў, ні яго адраджэння, ні палітычна і эканамічна моцнай дзяржавы. „Краёвец” абавязаны ўмець данесці нацыянальную ідэю да людзей. А калі навучанне адбываецца ў лесе, каля вогнішча, яно лепей успрымаецца.

— Падчас абучэнняў і акцый „краёўцы” апранаюць вайсковую форму. Калі атрад „Краю” ідзе калонай маршавым крокам, адчуванне, што гэта сапраўднае войска. Ці не будзе ваша арганізацыя ў будучай незалежнай Беларусі падмуркам для стварэння афіцэрскага корпусу краіны?

— Хутчэй нешта накшталт краёвай абароны ці нацыянальнай гвардыі. Мы змагаемся за Беларусь, а не за пасады, за права беларусаў быць гаспадарамі сваёй долі і дзяржавы, а не за магчымасць панаваць над уласным народам. Якая б не была ўлада ў Беларусі, мы будзем яе падтрымліваць толькі датуль, пакуль яна дзейнічае ў інтарэсах нацыі, а не ў сваіх уласных.

Што датычыць вайсковай формы. Яна дысцыплінуе і яднае. „Край” не партыйная арганізацыя, а хутчэй ордэн, адна сям’я. Мы сваіх хлопцаў баронім у любой сітуацыі і ў любым месцы. Кожны адчувае падтрымку ўсіх.

— А якія ў вас адносіны з сучаснымі палітычнымі апазіцыйнымі партыямі?

— Можам супрацоўнічаць з тымі, хто стаіць на грунце беларускай нацыянальнай ідэі, для каго мэта — пабудова Беларускай Незалежнай Нацыянальнай Дзяржавы. Але, для тых, для каго галоўнае дабіцца ўлады, і якія дзеля гэтага могуць пайсці нават на дамову з існуючым рэжымам, ніякіх сентыментаў у нас няма.

— Хто можа стаць „краёўцам”?

— Той, каму споўнілася 16 гадоў, хто годна прайшоў кандыдацкі тэрмін. Пасля прыняцця прысягі на вернасць Беларусі, ён можа стаць сябрам „Краю”. Хлопцы пасля 14 да 16 гадоў маюць магчымасць увайсці ў склад нашага юнацтва.