У Гродне з саюзнай дамовы зрабілі вогнішча

Зміцер КІСЕЛЬ

Па плане арганізатараў, а імі былі кіраўнікі „Гродзенскай ініцыятывы” (намінальна лічыцца, што ў ёй аб’ядналася некалькі дзесяткаў палітычных і няўрадавых арганізацый Гродна), вечарам 24 лістапада гродзенцы павінны былі хадзіць невялікімі групамі па цэнтральнай вуліцы горада з запаленымі ліхтарыкамі, свечкамі і запальнічкамі.

На самай справе, у 17 гадзін тысячы гродзенцаў сабраліся на вул. Савецкай. Некаторыя прыйшлі з ліхтарыкамі, шмат хто са свечкамі, іншыя запальвалі запальнічкі. Аднак моўчкі прагульвацца групамі па некалькі чалавек людзі не пажадалі. Згрупаваўшыся ў калону, яны, скандуючы антылукашэнкаўскія і патрыятычныя лозунгі рушылі па вуліцы. Арганізатары не кіравалі акцыяй. Па калоне пайшла чутка, што іх арыштавалі. (Як потым высветлілася гэтую дэзінфармацыю паведаміў удзельнікам акцыі нейкі палкоўнік міліцыі. На самай справе, па незразумелых прычынах да пачатку мерапрыемства былі затрыманы два чалавекі і пасля яе яшчэ адзін. Усіх хутка адпусцілі. На аднаго, Алеся Астроўскага, быў складзены пратакол). Каб не „падстаўляць” арганізатараў, людзі не выходзілі за межы цэнтральнай часткі горада, а некалькі разоў прайшлі па Савецкай вуліцы. Падышлі яны і да аблвыканкама, дзе калону сустрэла міліцыя. Ахоўнікі правапарадку баяліся, што дэманстранты перакрыюць праезджую частку. Аднак мэтай людзей быў якраз аблвыканкам. У гэты час яго супрацоўнікі выходзілі з працы. Пачуліся воклічы: „Ганьба!”, „Саюз не! Незалежнасць так!”

Пасля калона развярнулася і зноў рушыла па Савецкай вуліцы. Напрыканцы акцыі людзі спыніліся і пачалі паліць саюзныя дамовы. У прыцемках гэта выглядала так, нібыта ў цэнтры горада нехта развёў некалькі вогнішчаў.